കൊല്ലം: കണ്‍സ്ട്രക്ഷന്‍ ഫെഡറേഷന്‍ ഓഫ് ഇന്ത്യ ദേശവ്യാപകമായി നടത്തുന്ന സമരത്തിന്റെ ഭാഗമായി കൊല്ലം ജില്ലയില്‍ നിര്‍മാണ തൊഴിലാളികള്‍ ചിന്നക്കട ഹെഡ് പോസ്റ്റ് ഓഫിസിനു മുന്നില്‍ മാര്‍ച്ചും ധര്‍ണയും നടത്തി.
നിര്‍മാണ വ്യവസായത്തിലെ തൊഴില്‍ മാന്ദ്യം പരിഹരിക്കുക, പശ്ചാത്തല വികസന പദ്ധതികള്‍, ഭവന നിര്‍മാണ പദ്ധതികള്‍ എന്നിവയ്ക്ക് ഫണ്ട് അനുവദിക്കുക, കരിങ്കല്‍, ചെങ്കല്‍, മണല്‍, കളിമണ്‍ ഖനന നിരോധനം ഒഴിവാക്കുക, സിമന്റ്, പെയിന്റ്, സ്റ്റീല്‍ മുതലായവയുടെ വില നിയന്ത്രിക്കുക, കണ്‍സ്ട്രക്ഷന്‍ വെല്‍ഫയര്‍ ആക്ട് എല്ലാ സംസ്ഥാനങ്ങളിലും നടപ്പിലാക്കി ആനുകുല്യങ്ങള്‍ വിതരണം ചെയ്യുക, വെല്‍ഫയര്‍ ഫണ്ട് ബോര്‍ഡ് വകമാറ്റി ചെലവഴിക്കുന്നത് നിര്‍ത്തലാക്കുക, സെസ് പിരിവ് ഊര്‍ജ്ജിതമാക്കുക, മിനിമം കൂലി 18000 രൂപയായി നിശ്ചയിക്കുക, 500, 1000 രൂപ കറന്‍സി റദ്ദ് ചെയ്തുകൊണ്ടുള്ള കേന്ദ്ര സര്‍ക്കാര്‍ നടപടി ഒഴിവാക്കുക, കേരളത്തിന് അനുവദിച്ചിരുന്ന റേഷന്‍ അന്യായമായി വെട്ടിക്കുറച്ചത് പിന്‍വലിക്കുക തുടങ്ങിയ ആവശ്യങ്ങള്‍ ഉന്നയിച്ചായിരുന്നു മാര്‍ച്ചും ധര്‍ണയും സംഘടിപ്പിച്ചത്.
ആര്‍.ഗോപി ധര്‍ണക്ക് അധ്യക്ഷനായി. സി.ഐ.ടി.യു ജില്ലാ വൈസ് പ്രസിഡന്റ് രാജേന്ദ്രന്‍ ഉദ്ഘാടനം ചെയ്തു. വി. രഘുനാഥന്‍, ആര്‍. രവീന്ദ്രന്‍, എസ്. ശിവന്‍പിള്ള, എല്‍. ഉദയന്‍ ജി. ഉദയകുമാര്‍, പി.ആര്‍ രാജശേഖരപിള്ള, പി. നടരാജന്‍, പി. ദേവരാജന്‍, ബി. വിജയന്‍പിള്ള, ബി. രാജേന്ദ്രന്‍, കെ. ബാബു സംസാരിച്ചു. എം.വൈ ആന്റണി സ്വാഗതവും പി.ഡി ജോസ് നന്ദിയും പറഞ്ഞു. കെ.എസ്.ആര്‍.ടി.സി ബസ് സ്റ്റാന്‍ഡിനു മുന്നില്‍ നിന്നും ആരംഭിച്ച ധര്‍ണയ്ക്കും എസ്.എല്‍ പത്മാവതി, ബി. ബിനു, എം. മോഹനന്‍പിള്ള, എന്‍. സുധാകരന്‍, എ.എം റാഫി, അഡ്വ. ജി. ഉദയകുമാര്‍ നേതൃത്വം നല്‍കി.