റിയാദ്: രണ്ടു ദിവസത്തിനകം നാട്ടില്‍ പോകാനിരുന്ന മലപ്പുറം സ്വദേശിക്കു അപകടത്തില്‍ ഗുരുതര പരുക്ക്. മലപ്പുറം കിഴിശ്ശേരി ഒഴുകൂര്‍ സ്വദേശി കാരാട്ട് ചാലില്‍ മുഹമ്മദിനാണ് (56) വാഹനാപകടത്തില്‍ പരുക്കേറ്റു ആശുപത്രിയില്‍ പ്രവേശിപ്പിച്ചത്.

വാരിയെല്ലിനും കാലുകള്‍ക്കും ക്ഷതമേറ്റ ഇദ്ദേഹത്തെ ഖമീസ് മുശൈത് സൈനിക ആശുപത്രിയിലാണ് പ്രവേശിപ്പിച്ചിരിക്കുന്നത്. നെഞ്ചിനും ആന്തരായവയവങ്ങള്‍ക്കും പരിക്കേറ്റിട്ടുണ്ടെന്നു ആശുപത്രി വൃത്തങ്ങള്‍ പറഞ്ഞു. പരുക്കേറ്റ കാലില്‍ ശാസ്ത്രക്രിയയും നടത്തിയിട്ടുണ്ട്.

ഖമീസ് മുശൈത് എയര്‍ ബേസിനടുത്തുള്ള ഖര്‍മൂഷി റസ്‌റ്റോറന്റ് ജീവനക്കാരനായ ഇദ്ദേഹം രണ്ടു ദിവസത്തിനകം നാട്ടില്‍ പോകാനുള്ള ഒരുക്കത്തിലായിരുന്നു. റോഡ് മുറിച്ചു കടക്കുന്നതിനിടെ പാകിസ്താന്‍ സ്വദേശി ഓടിച്ചിരുന്ന വാഹനം അമിത വേഗതയില്‍ ഇടിച്ചു തെറിപ്പിച്ചാണ് അപകടം. അഞ്ചു മക്കളുടെ പിതാവായ ഇദ്ദേഹം 22 വര്‍ഷമായി ഖര്‍മൂഷി കമ്പനിയില്‍ ജോലിക്കാരനാണ്.