ന്യൂഡല്‍ഹി: ഏഷ്യന്‍ ട്രാക്ക് സൈക്ലിങ് പോരാട്ടത്തില്‍ ഇന്ത്യക്ക് രണ്ടാം മെഡല്‍. മലയാളി താരം അലീന റെജിയിലൂടെയാണ് ഇന്ത്യ മെഡല്‍ നേട്ടമുയര്‍ത്തിയത്. ജൂനിയര്‍ വനിതകളുടെ 500 മീറ്റര്‍ ടൈം ട്രയല്‍ മത്സരത്തില്‍ 37.439 സെക്കന്‍ഡില്‍ ദേശീയ റെക്കോര്‍ഡോടെ അലീന വെങ്കലം നേടി.
നേരത്തെ ആദ്യ ദിനത്തില്‍ ടീം സ്പ്രിന്റ് ഇനത്തില്‍ വെങ്കലം നേടിയ ടീമിലും അംഗമായിരുന്ന അലീന ഇരട്ട വെങ്കല നേട്ടത്തിനും ഉടമയായി. ഈയിനത്തില്‍ ചൈനയുടെ ചോ യു ഷെന്‍ സ്വര്‍ണവും കൊറിയയുടെ സിയോല്‍ഹ്വ ജിയോങ് വെള്ളിയും നേടി.
സ്വന്തം പേരിലുള്ള ദേശീയ റെക്കോര്‍ഡ് സമയമാണു അലീന മെച്ചപ്പെടുത്തിയത്. നേരത്തെ 37.80 സെക്കന്‍ഡായിരുന്നു താരത്തിന്റെ മികച്ച സമയം. രണ്ടു വെങ്കല മെഡലുമായി ഇന്ത്യ പോയിന്റ് പട്ടികയില്‍ ഒന്‍പതാം സ്ഥാനത്താണ്.
അതേസമയം ഇന്ത്യയുടെ ഏറ്റവും വലിയ മെഡല്‍ പ്രതീക്ഷയായിരുന്ന ഡെബോറ ഹെറോള്‍ഡിനു മെഡല്‍ നേടാന്‍ സാധിക്കാതെ പോയി. ഇഷ്ടയിനമായ 500 മീറ്റര്‍ ടൈം ട്രയല്‍ പോരാട്ടത്തില്‍ താരം നാലാം സ്ഥാനത്താണു ഫിനിഷ് ചെയ്തത്.