മക്ക: വിശുദ്ധ കഅ്ബക്കരികില്‍ സ്വദേശി യുവാവ് നടത്തിയ ആത്മാഹുതി ശ്രമം പൊലിസ് തടഞ്ഞു. മാനസിക വിഭ്രാന്തിയുള്ള യുവാവാണ് തീകൊളുത്തി ആത്മഹത്യക്ക് ശ്രമിച്ചതെന്ന് ഹറംകാര്യ സുരക്ഷാവിഭാഗം അറിയിച്ചു. ഇയാളില്‍ നിന്ന് പെട്രോളും ലൈറ്ററും പിടിച്ചെടുത്തു. 40 വയസുള്ള സ്വദേശി പൗരന്റെ വിശദാംശങ്ങള്‍ പൊലിസ് പുറത്തുവിട്ടിട്ടില്ല. യുവാവിനെ പൊലിസ് അറസ്റ്റ് ചെയ്യുന്ന ദൃശ്യങ്ങള്‍ സാമൂഹിക മാധ്യമങ്ങളില്‍ പ്രചരിക്കുന്നുണ്ട്.
പിടിയിലായ സ്വദേശിപൗരന്‍ മാനസിക രോഗിയാണെന്ന് അധികൃതരെ ഉദ്ധരിച്ച് അറബ് ന്യൂസും റിപ്പോര്‍ട്ട് ചെയ്തു. തിങ്കളാഴ്ച അര്‍ധരാത്രിയോടെയാണ് തീര്‍ഥാടകവേഷത്തിലുള്ള പൗരനെ മറ്റ് തീര്‍ഥാടകരും പൊലിസും ചേര്‍ന്നു പിടികൂടിയത്. ഇയാള്‍ കിസ്‌വക്ക് സമീപം സ്വയം തീകൊളുത്താന്‍ ശ്രമിക്കുകയായിരുന്നു. പിതൃസഹോദരരുമായുള്ള സ്വത്ത് തര്‍ക്കത്തില്‍ കോടതിയുടെ ശ്രദ്ധ പിടിച്ചുപറ്റാനാണ് ഇങ്ങനെ ചെയ്തതെന്ന് ഇയാള്‍ മൊഴി നല്‍കിയതായും റിപ്പോര്‍ട്ടുണ്ട്. എന്നാല്‍ ഇയാള്‍ക്ക് മാനസികവിഭ്രാന്തിയുള്ളതായി ചോദ്യം ചെയ്യലില്‍ വ്യക്തമായെന്ന് സുരക്ഷാവിഭാഗം മാധ്യമവക്താവ് അറിയിച്ചു.
നേരത്തെ കഅ്ബ കത്തിക്കാന്‍ ശ്രമിച്ചുവെന്നു ചില പ്രാദേശികമാധ്യമങ്ങളെ ഉദ്ധരിച്ച് ചൈനീസ് വാര്‍ത്താ ഏജന്‍സി സിന്‍ഹുവ റിപ്പോര്‍ട്ട് ചെയ്തതു പരിഭ്രാന്തി പരത്തിയിരുന്നു. തുടര്‍ന്നു പ്രമുഖ അന്താരാഷ്ട്ര വാര്‍ത്താ ഏജന്‍സികള്‍ ഹറം പൊലിസിനെയും ദൃക്‌സാക്ഷികളെയും ഉദ്ധരിച്ച് ഇതു തിരുത്തുകയായിരുന്നു.