കൊച്ചി: സന്തോഷ് ട്രോഫി യോഗ്യത പോരാട്ടങ്ങള്‍ക്കായി കേരള ടീം ബംഗളൂരുവില്‍ എത്തി. കൊച്ചിയില്‍ നിന്ന് ഇന്നലെ രാവിലെ 9.10ന് ട്രെയിന്‍ മാര്‍ഗമാണ് ടീം യാത്ര തിരിച്ചത്. 18ന് ആരംഭിക്കുന്ന യോഗ്യതാ റൗണ്ട് മത്സരങ്ങളില്‍ ആന്ധ്രപ്രദേശ് ആണ് കേരളത്തിന്റെ ആദ്യ എതിരാളി. 22ന് തമിഴ്‌നാടിനെതിരെയാണ് രണ്ടാമത്തെ മത്സരം. ആന്‍ഡമാന്‍ നിക്കോബാര്‍ ദ്വീപ് അവസാന നിമിഷം സന്തോഷ് ട്രോഫിയില്‍ നിന്ന് പിന്‍വാങ്ങിയതിനാല്‍ കേരളം ഉള്‍പ്പെടുന്ന ഗ്രൂപ്പ് മൂന്ന് ടീമുകളായി ചുരുങ്ങി. ഗ്രൂപ്പിലെ ഒന്നാം സ്ഥാനക്കാര്‍ ഫൈനല്‍ റൗണ്ടിലേക്ക് യോഗ്യത നേടും.
വളരെ പ്രതീക്ഷയോടെയാണ് കേരള ടീം യാത്ര തിരിക്കുന്നതെന്ന് കോച്ച് സതീവന്‍ ബാലന്‍ പറഞ്ഞു. ആന്‍ഡമാന്‍ പിന്‍മാറിയതോടെ ആന്ധ്രപ്രദേശും തമിഴ്‌നാടുമാണ് എതിരാളികള്‍. ഗ്രൂപ്പിലെ രണ്ട് മത്സരങ്ങളും ജയിച്ച് ഫൈനല്‍ റൗണ്ടിലേക്ക് യോഗ്യത ഉറപ്പിക്കുകയാണ് ലക്ഷ്യം. അല്‍പം ബുദ്ധിമുട്ടിയെങ്കില്‍ മാത്രമേ ഫുട്ബാളില്‍ വിജയം കുറിക്കാനാകു. മികച്ച പ്രകടനം കാഴ്ചവെയ്ക്കാന്‍ കേരളത്തിന്റെ യുവ താരങ്ങള്‍ പ്രാപ്തരാണ്. ആന്ധ്ര, തമിഴ്‌നാട് ടീമുകളിലും യുവ താരങ്ങളെയാണ് പ്രതീക്ഷിക്കുന്നത്. ഐ.എസ്.എല്‍, ഐ ലീഗ് മത്സരങ്ങള്‍ നടക്കുന്നതിനാല്‍ സീനിയര്‍ താരങ്ങള്‍ കുറവായിരിക്കുമെന്നും സതീവന്‍ ബാലന്‍ പറഞ്ഞു. കഴിഞ്ഞ തവണ സെമി ഫൈനല്‍ വരെ എത്തിയ കേരള ടീം ഗോവയോട് തോല്‍ക്കുകയായിരുന്നു.