വാഷിങ്ടണ്‍കേപ്ടൗണ്‍: കുടിയേറ്റ രാജ്യങ്ങള്‍ക്കെതിരേ വംശീയാധിക്ഷേപം നടത്തിയതിനു പിറകെ ന്യായീകരണവുമായി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. താന്‍ വംശീയവിരോധിയല്ലെന്നും നിങ്ങള്‍ അഭിമുഖം നടത്തിയവരില്‍ ഏറ്റവും കുറഞ്ഞ വംശീയവാദിയായിരിക്കും താനെന്നും ട്രംപ് മാധ്യമങ്ങളോട് പറഞ്ഞു.
ഇതാദ്യമായാണു വംശീയാധിക്ഷേപ ആരോപണങ്ങളോട് ട്രംപ് നേരിട്ട് പ്രതികരിക്കുന്നത്. ഫ്‌ളോറിഡയിലെ വെസ്റ്റ് പാം ബീച്ചിലുള്ള ട്രംപ് ഇന്റര്‍നാഷനല്‍ ഗോള്‍ഫ് ക്ലബില്‍ വൈറ്റ്ഹൗസ് മാധ്യമസംഘത്തോട് സംസാരിക്കുകയായിരുന്നു ട്രംപ്. അതേസമയം, ആഫ്രിക്കന്‍ രാജ്യങ്ങള്‍ ഉള്‍പ്പെടെയുള്ള കുടിയേറ്റക്കാര്‍ക്കെതിരേ നടത്തിയ അസഭ്യപരാമര്‍ശത്തിനെതിരേ നയതന്ത്ര തലത്തില്‍ പ്രതിഷേധമറിയിക്കുമെന്ന് ദക്ഷിണാഫ്രിക്ക പറഞ്ഞു. വിദേശകാര്യ മന്ത്രാലയമാണ് ഇക്കാര്യം വ്യക്തമാക്കിയത്. പ്രിട്ടോറിയയിലുള്ള യു.എസ് എംബസിയില്‍ നേരിട്ട് പ്രതിഷേധമറിയിക്കാനാണു തീരുമാനം.
കഴിഞ്ഞയാഴ്ച തന്റെ ഔദ്യോഗിക വസതിയായ ഓവല്‍ ഓഫിസില്‍ സെനറ്റ് അംഗങ്ങളുമായുള്ള സ്വകാര്യ കൂടിക്കാഴ്ചക്കിടെയാണ് ട്രംപ് വംശീയാധിക്ഷേപം നടത്തിയതായി ആരോപണമുയര്‍ന്നിരിക്കുന്നത്. ഭരണകൂടത്തിന്റെ കുടിയേറ്റനയങ്ങളെ കുറിച്ചു ചര്‍ച്ച ചെയ്യാനെത്തിയതായിരുന്നു സെനറ്റ് അംഗങ്ങള്‍. ഹെയ്തി, എല്‍സാല്‍വദോര്‍, ആഫ്രിക്കന്‍ രാജ്യങ്ങള്‍ എന്നിവയെ പരാമര്‍ശിച്ചപ്പോള്‍ വൃത്തികെട്ട(മലദ്വാരം പോലെയുള്ള) രാജ്യങ്ങളില്‍ നിന്നുള്ള ആളുകളെ നാം എന്തിന് സ്വീകരിക്കണമെന്ന് ട്രംപ് ക്ഷോഭിക്കുകയായിരുന്നു. ഇതു വിവാദമായ ഉടന്‍ നിഷേധക്കുറിപ്പുമായി ട്രംപ് ട്വിറ്ററില്‍ രംഗത്തെത്തുകയും ചെയ്തു. പരുഷ ഭാഷയില്‍ സംസാരിച്ചതു ശരിയാണെന്നും എന്നാല്‍ താന്‍ പ്രചരിപ്പിക്കുന്ന തരത്തിലുള്ള പരാമര്‍ശങ്ങള്‍ നടത്തിയിട്ടില്ലെന്നുമായിരുന്നു ട്രംപിന്റെ വിശദീകരണം.
ട്രംപിന്റെ അസഭ്യപരാമര്‍ശത്തെ ഐക്യരാഷ്ട്രസഭ രൂക്ഷമായി വിമര്‍ശിച്ചിട്ടുണ്ട്. ഇതു തീര്‍ത്തും വംശീയാധിക്ഷേപമാണെന്നായിരുന്നു യു.എന്‍ മനുഷ്യാവകാശ സമിതി വക്താവിന്റെ പ്രതികരണം. ലോകരാഷ്ട്രങ്ങളും പ്രസ്താവനയ്‌ക്കെതിരേ രംഗത്തെത്തിയിരുന്നു.