കാളികാവ്: ചേളാരിയിലെ ഒറ്റമുറിയില്‍ വര്‍ഷങ്ങളായി തനിച്ചു കഴിഞ്ഞിരുന്ന മുഹമ്മദ് (84) ഇനി കാളികാവ് അടക്കാകുണ്ടണ്ടില്‍ പ്രവര്‍ത്തനമാരംഭിച്ച ഹിമ കെയര്‍ ഹോമില്‍ കഴിയും. തച്ചുശാസ്ത്ര വിദഗ്ധനായ മുഹമ്മദ് 35 വര്‍ഷം മുന്‍പു പ്രത്യേക സാഹചര്യത്തില്‍ വീടുവിട്ടിറങ്ങിയതാണ്. നിരവധി സ്ഥാപനങ്ങളില്‍ ആശാരിപ്പണിയടക്കം കൈത്തൊഴില്‍ പഠിപ്പിച്ചാണ് നല്ലകാലം ചെലവഴിച്ചത്. രോഗം തളര്‍ത്തിയ ശരീരത്തെ പരിപാലിക്കാന്‍ സ്വന്തമായി കഴിയാതെ പരസഹായം അനിവാര്യമായതോടെയാണ് ഹിമയുടെ തീരത്തണഞ്ഞത്. മുഹമ്മദിന്റെ ദയനീയാവസ്ഥ മനസിലാക്കി സമസ്താലയത്തിലെ ജീവനക്കാരായ മഹ്ബൂബ് മാളിയേക്കലിന്റെ നേതൃത്വത്തിലുള്ള സംഘമാണ് ഹിമയുമായി ബന്ധപ്പെടുത്തിയത്. ഹിമയുടെ മുഖ്യരക്ഷാധികാരി പാണക്കാട് സയ്യിദ് ഹൈദരലി ശിഹാബ് തങ്ങള്‍ വിവരമറിഞ്ഞ ഉടനെ അവരുടെ അപേക്ഷ പരിഗണിച്ച് ആദ്യ അന്തേവാസിയായി പ്രവേശനം നല്‍കുകയും ചെയ്തു.
ഹിമ രജിസ്‌ട്രേഷന്‍ ഉദ്ഘാടന ചടങ്ങില്‍ അഡ്വ. എം. ഉമര്‍ എം.എല്‍.എ, വാക്കോട് മൊയ്തീന്‍കുട്ടി ഫൈസി, പുത്തനഴി മൊയ്തീന്‍ ഫൈസി, ചെയര്‍മാന്‍ എ.പി ബാപ്പുഹാജി, ജനറല്‍ സെക്രട്ടറി ഫരീദ് റഹ്മാനി കാളികാവ്, ഡയറക്ടര്‍മാരായ സലാം ഫൈസി ഇരിങ്ങാട്ടിരി, സുലൈമാന്‍ ഫൈസി മാളിയേക്കല്‍, ബഹാഉദ്ദീന്‍ ഫൈസി സംബന്ധിച്ചു.