മലപ്പുറം: 2014-15 അധ്യയന വര്‍ഷത്തില്‍ അനുവദിച്ച ഹയര്‍സെക്കന്‍ഡറി ബാച്ചുകളിലെ ഗസ്റ്റ് അധ്യാപകരുടെ ശമ്പളവിതരണം വേഗത്തിലാക്കാന്‍ നിര്‍ദേശം. മൂന്നു വര്‍ഷത്തിലധികം ജോലി ചെയ്തിട്ടും ശമ്പളം ലഭിക്കാത്ത എയ്ഡഡ് സ്‌കൂള്‍ അധ്യാപകര്‍ക്ക് ശമ്പളം നല്‍കാന്‍ മാസങ്ങള്‍ക്കു മുന്‍പ് ഉത്തരവിറങ്ങിയിരുന്നെങ്കിലും ഉത്തരവ് സംബന്ധിച്ച് വ്യക്തതയില്ലാത്തതിനാല്‍ ജില്ലയില്‍ ഉള്‍പ്പെടെ വിതരണം നടന്നിരുന്നില്ല.
ഇതിന്റെ പശ്ചാത്തലത്തിലാണ് വ്യക്തത വരുത്തി സര്‍ക്കാര്‍ ഉത്തരവായത്. 2014-15 വര്‍ഷത്തില്‍ പുതിയ ബാച്ച് അനുവദിച്ചുകിട്ടിയ വിദ്യാലയങ്ങളില്‍ ആദ്യ രണ്ടുവര്‍ഷം ഗസ്റ്റ് അധ്യാപകരെ നിയമിക്കാനായിരുന്നു നിര്‍ദേശം. ഇത് ഒരു വര്‍ഷംകൂടി ദീര്‍ഘിപ്പിച്ചെങ്കിലും സര്‍ക്കാര്‍ വിദ്യാലയങ്ങളിലെ ഗസ്റ്റ് അധ്യാപകര്‍ക്ക് മാത്രമാണ് കൃത്യമായി ശമ്പളം ലഭിച്ചിരുന്നത്. ഇത്തരത്തില്‍ ശമ്പളം ലഭിക്കാതെ പ്രയാസത്തിലായ ജില്ലയിലെ ആയിരത്തോളം ഹയര്‍സെക്കന്‍ഡറി അധ്യാപകര്‍ക്കാണ് പുതിയ തീരുമാനം ഗുണം ചെയ്യുക.
അടിയന്തിര ഘട്ടത്തില്‍ നടന്ന ഗസ്റ്റ് അധ്യാപക നിയമനം ആയതിനാല്‍ സ്ഥിരം അധ്യാപക നിയമനത്തിനു പാലിക്കുന്ന പ്രക്രിയകളൊന്നും ആവശ്യമില്ലെന്നു ഹയര്‍സെക്കന്‍ഡറി ജോയിന്റ് ഡയറക്ടര്‍ ബന്ധപ്പെട്ട റീജ്യണല്‍ ഡെപ്യൂട്ടി ഡയറക്ടര്‍മാര്‍ക്കു നല്‍കിയ ഉത്തരവില്‍ പറയുന്നു. വിഷയം അടിയന്തിരമായി നടപ്പാക്കണമെന്നാണ് നിര്‍ദേശിച്ചിട്ടുള്ളത്. അതേസമയം, മൂന്നു വര്‍ഷത്തിലധികമായി മുടങ്ങിക്കിടക്കുന്ന ദിവസവേതനം വിതരണം ചെയ്യുന്നതിന് ഉടന്‍ പ്രത്യേക അദാലത്തുകള്‍ നടത്തണമെന്നാണ് സ്‌കൂള്‍ മാനേജര്‍മാരും അധ്യാപകരും ആവശ്യപ്പെടുന്നത്.