ചേളാരി: എസ്.കെ.എസ്.ബി.വി സംസ്ഥാന കമ്മിറ്റി സംഘടിപ്പിക്കുന്ന ജ്ഞാനതീരം വിജ്ഞാന പരീക്ഷയുടെ യൂണിറ്റ്തല മത്സരങ്ങള്‍ 20, 21 തിയതികളില്‍ നടക്കും. 20ന് രാവിലെ 5,6,7 ക്ലാസുകളിലെ മദ്‌റസാ വിദ്യാര്‍ഥികള്‍ക്കായി യൂണിറ്റുതലങ്ങളില്‍ എഴുത്തുപരീക്ഷ നടത്തും. തുടര്‍ന്ന് വിദ്യാര്‍ഥികള്‍ക്ക് അന്വേഷണാത്മക ചോദ്യം നല്‍കുകയും 21ന് വൈകിട്ട് 6ന് മുന്‍പായി തിരികെ ഏല്‍പ്പിക്കുകയും ചെയ്യുന്ന പരീക്ഷാ രീതിയാണ് ജ്ഞാനതീരം മത്സരത്തില്‍ ക്രമീകരിച്ചിട്ടുള്ളത്. യൂണിറ്റ്തല മത്സരത്തില്‍ 75 ശതമാനം മാര്‍ക്ക് നേടിയ വിദ്യാര്‍ഥികളുടെ പേരുവിവരങ്ങള്‍ 24ന് മുന്‍പായി റെയ്ഞ്ച് കമ്മിറ്റിയെ ഏല്‍പ്പിക്കണം. റെയ്ഞ്ച് കമ്മിറ്റി 28ന് മുന്‍പായി ഇത് സംസ്ഥാന കമ്മിറ്റിയുടെ ഔദ്യോഗിക വെബ്‌സൈറ്റില്‍ അപ്‌ലോഡ് ചെയ്യണം.
യൂണിറ്റുതല മത്സരങ്ങളുടെ സുഗമമായ നടത്തിപ്പിന് മുഴുവന്‍ യൂനിറ്റ്, റെയ്ഞ്ച് ചെയര്‍മാന്‍, കണ്‍വീനര്‍, മറ്റു ഭാരവാഹികള്‍ എന്നിവര്‍ കര്‍മരംഗത്തിറങ്ങണമെന്ന് സുന്നി ബാലവേദി സംസ്ഥാന ചെയര്‍മാന്‍ അബ്ദുല്‍ ഖാദര്‍ ഖാസിമി, പ്രസിഡന്റ് പാണക്കാട് അസീല്‍ അലി ശിഹാബ് തങ്ങള്‍, ജ്ഞാനതീരം സംസ്ഥാന കോര്‍ഡിനേറ്റര്‍ റിസാല്‍ദര്‍ അലി എറണാകുളം എന്നിവര്‍ അഭ്യര്‍ഥിച്ചു.