തിരുവനന്തപുരം: പേടിയില്ല... പേടിയില്ല ഞങ്ങള്‍ക്കാര്‍ക്കും, ഒപ്പമുണ്ട്... ഒപ്പമുണ്ട് കേരളാ പൊലിസ്... പഞ്ചാബി സംഗീതമായ ബംഗറയുടെ ചടുലതാളവുമായി സ്റ്റുഡന്റ്‌സ് പൊലിസ് കേഡറ്റിന് തീം സോങ് ഒരുങ്ങുന്നു.
പൊലിസ് ട്രെയ്‌നിങ് കോളജ് പ്രിന്‍സിപ്പളായ ഡി.ഐ.ജി സേതുരാമനാണ് രചന നിര്‍വഹിച്ചിരിക്കുന്നത്. പൊലിസ് ഓര്‍കസ്ട്രയുടെ ചുമതലക്കാരനായ കെ.എ ജോസഫ്, പൊലിസ് ട്രെയ്‌നിങ് കോളജിലെ എസ്.ഐ പി.കെ പ്രകാശ് എന്നിവരാണ് സംഗീതം ഒരുക്കിയിരിക്കുന്നത്. ജാസി ഗിഫ്റ്റ് അടക്കമുള്ള നാല് ഗായകരാണ് ഗാനം ആലപിച്ചിരിക്കുന്നത്. കുട്ടിപ്പൊലിസിന്റെ പ്രവര്‍ത്തനങ്ങള്‍ വിശദമാക്കുന്നതരത്തിലാണ് പാട്ടുകളിലെ വരികള്‍. തീം സോങ് ഈ മാസം അവസാനം പുറത്തിറങ്ങും.