നിലമ്പൂര്‍: ഇരുചക്രവാഹനങ്ങളില്‍ രൂപമാറ്റം വരുത്തി വിദ്യാര്‍ഥികളടക്കം റോഡിലിറങ്ങിയിട്ടും അധികൃതര്‍ പരിശോധനകള്‍ കര്‍ശനമാക്കുന്നില്ല. മേഖലയില്‍ നിരവധി ഇരുചക്ര വാഹനങ്ങളാണ് സൈലന്‍സറിലടക്കം രൂപമാറ്റം വരുത്തി വന്‍ ശബ്ദത്തോടെ റോഡിലൂടെ പറക്കുന്നത്. ഇത്തരത്തില്‍ ശബ്ദം കൂട്ടുന്നത് വാഹനം സ്പീഡു കൂട്ടാനും ഓടിക്കുന്നവര്‍ക്ക് പ്രേരണയാവുന്നുണ്ട്.
രാത്രി സമയങ്ങളില്‍ ഗ്രാമീണ റോഡുകളിലൂടെയടക്കം ഇത്തരം ഇരുചക്രവാഹനങ്ങള്‍ ഇരമ്പി പായുന്നത് നാട്ടുകാര്‍ക്ക് ശല്യമാകുകയാണ്. എന്നാല്‍ ഇത്തരം വാഹനങ്ങള്‍ പരിശോധനയില്‍ കണ്ടെത്താറില്ല. നിയമലംഘനത്തിലുപരി നിരവധി ആരോഗ്യപ്രശ്‌നങ്ങളുണ്ടാക്കുന്ന ശബ്ദശല്യമാണ് ഇത്തരം വാഹനങ്ങള്‍ കാരണം ഉണ്ടാകുന്നത്.
ഉയരം കൂടിയ പിന്‍സീറ്റില്‍ നിന്നും അമിത വേഗതയില്‍ പോവുന്നതിനിടെ തെറിച്ചുവീണ് പരുക്കേറ്റവും ധാരാളമുണ്ട്. ഇതിനു പുറമേയാണ് ടൂറിസ്റ്റ് ബസുകളടക്കം രാത്രികാലങ്ങളില്‍ എല്‍.ഇ.ഡി ലൈറ്റുകള്‍ അനധികൃതമായി ഉപയോഗിച്ചു സര്‍വീസ് നടത്തുന്നത്. മേഖലയില്‍ സര്‍വീസ് നടത്തുന്ന സ്വകാര്യ ബസുകളും ഇത്തരത്തില്‍ ലൈറ്റുകള്‍ ഉപയോഗിക്കുന്നുണ്ട്. ഇത്തരം വാഹനങ്ങള്‍ മറ്റു വാഹനങ്ങള്‍ക്ക് അപകടസാധ്യത വര്‍ധിപ്പിക്കുകയാണ് ചെയ്യുന്നത്.
ഇത്തരം വാഹനങ്ങള്‍ വ്യാപകമായിട്ടും മോട്ടോര്‍ വാഹനവകുപ്പ് അടക്കമുള്ളവര്‍ നടപടികളെടുക്കുന്നില്ല.
ഇന്‍ഡിക്കേറ്ററുകള്‍ ഉള്‍പ്പെടെ ഇടാതെയും ഇടതുവശത്തു കൂടി ഓവര്‍ടേക്ക് ചെയ്തും വാഹനങ്ങളും ബൈക്കുകളും പോകുന്നത് പൊലിസും ഹോംഗാര്‍ഡുകളും കണ്ടില്ലെന്ന് നടിക്കുകയാണ്.