ലണ്ടന്‍: ഒടുവില്‍ മാഞ്ചസ്റ്റര്‍ സിറ്റി വീണു. ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ സീസണിലാദ്യമായി മാഞ്ചസ്റ്റര്‍ സിറ്റി തോല്‍വിയറിഞ്ഞു. ലിവര്‍പൂളിനെതിരേ അവരുടെ തട്ടകമായ ആന്‍ഫീല്‍ഡില്‍ പക്ഷേ സിറ്റി പൊരുതിയാണ് കളം വിട്ടത്. ത്രില്ലര്‍ പോരാട്ടത്തില്‍ മൂന്നിനെതിരേ നാല് ഗോളുകള്‍ക്കാണ് ലിവര്‍പൂള്‍ വിജയം സ്വന്തമാക്കിയത്. ഒരു ഘട്ടത്തില്‍ 4-1 എന്ന നിലയിലായിരുന്ന സിറ്റി മത്സരം അവസാനിക്കുമ്പോള്‍ 4-3 എന്ന് സ്‌കോറാക്കിയാണ് പരാജയം സമ്മതിച്ചത്.
ഒന്‍പതാം മിനുട്ടില്‍ ചേംബര്‍ലെയ്ന്‍, 59ാം മിനുട്ടില്‍ ഫിര്‍മിനോ, 61ാം മിനുട്ടില്‍ സാദിയോ മാനെ, 68ാം മിനുട്ടില്‍ മുഹമ്മദ് സലാഹ് എന്നിവരാണ് ലിവര്‍പൂളിനായി ഗോളുകള്‍ നേടിയത്.
40ാം മിനുട്ടില്‍ സനെയിലൂടെ മാഞ്ചസ്റ്റര്‍ സിറ്റി സമനില പിടിച്ചെങ്കിലും പിന്നീട് മൂന്ന് ഗോളുകള്‍ വഴങ്ങി. എന്നാല്‍ 84ാം മിനുട്ടില്‍ ബെര്‍ണാര്‍ഡോ സില്‍വ, ഇഞ്ച്വറി ടൈമില്‍ ഗുണ്ടകനുമാണ് സിറ്റിയുടെ തോല്‍വി ഭാരം കുറയ്ക്കുന്ന ഗോളുകള്‍ വലയിലാക്കിയത്.