കാര്‍ഡിഫ്: മുന്‍ മാഞ്ചസ്റ്റര്‍ യുനൈറ്റഡ് ഇതിഹാസം റയാന്‍ ഗിഗ്ഗ്‌സ് വെയ്ല്‍സ് ഫുട്‌ബോള്‍ ടീം പരിശീലകന്‍. വെയ്ല്‍സ് ഫുട്‌ബോള്‍ അസോസിയേഷനാണ് ഗിഗ്ഗ്‌സിന്റെ നിയമനം ഔദ്യോഗികമായി പ്രഖ്യാപിച്ചത്. ക്രിസ് കോള്‍മാന്റെ രാജിയെ തുടര്‍ന്നാണ് ഗിഗ്ഗ്‌സിന്റെ വരവ്.
നേരത്തെ മാഞ്ചസ്റ്റര്‍ യുനൈറ്റഡിന്റെ പരിശീലകനായി ലൂയീസ് വാന്‍ ഗാല്‍ വന്നപ്പോള്‍ ഗിഗ്ഗ്‌സ് സഹ പരിശീലകനായി പ്രവര്‍ത്തിച്ചിരുന്നു.
പിന്നീട് വാന്‍ ഗാല്‍ പോയ ശേഷം മാഞ്ചസ്റ്റര്‍ യുനൈറ്റഡിന്റെ താത്കാലിക കോച്ചുമായിരുന്നു ഗിഗ്ഗ്‌സ്. ഇതാദ്യമായാണ് ഗിഗ്ഗ്‌സ് ഒരു ടീമിന്റെ മുഴുവന്‍ സമയ മുഖ്യ പരിശീലകനാകുന്നത്. ഈ വര്‍ഷം നടക്കുന്ന റഷ്യന്‍ ലോകകപ്പിന് വെയ്ല്‍സ് ടീമിന് യോഗ്യത നേടാന്‍ സാധിക്കാതെ വന്നതോടെയാണ് കോള്‍മാന്‍ രാജിവച്ചത്.
ദേശീയ ടീമിനെ പരിശീലിപ്പിക്കാന്‍ അവസരം ലഭിച്ചത് അംഗീകാരമായി കാണുന്നതായി ഗിഗ്ഗ്‌സ് പ്രതികരിച്ചു. 2020ലെ യൂറോ കപ്പ് യോഗ്യതയടക്കമുള്ള വെല്ലുവിളികളാണ് മുന്നിലുള്ളതെന്ന് ഗിഗ്ഗ്‌സ് വ്യക്തമാക്കി. മാര്‍ച്ചില്‍ അരങ്ങേറാനിരിക്കുന്ന ചൈന കപ്പ് 2018ലെ പോരാട്ടമാണ് ഗിഗ്ഗ്‌സിന്റെ കന്നി പരിശീലക പരീക്ഷണ വേദി.