പെരുമ്പാവൂര്‍: കഞ്ചാവ് വില്‍പന കേസില്‍ പ്രതിയായ യുവാവിനെ വീട്ടുമുറ്റത്ത് കഞ്ചാവ് ചെടി വളര്‍ത്തിയതിന് എക്‌സൈസ് പിടികൂടി. രായമംഗലം പുത്തൂരാന്‍ കവല സ്വദേശി കെ.എന്‍ സദനം വീട്ടില്‍ നിഖിലേഷ് (25)നെയാണ് പെരുമ്പാവൂര്‍ എക്‌സൈസ് സംഘം പിടികൂടിയത്. എക്‌സൈസ് ഇന്‍സ്‌പെക്ടര്‍ ടി.കെ ഗോപിക്ക് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് തൊടിയില്‍ നട്ട് വളര്‍ത്തിയ കഞ്ചാവ് ചെടി കണ്ടെത്തിയത്. ഒന്നര അടി ഉയരവും 14 ശിഖിരങ്ങളുമുള്ള കഞ്ചാവ് ചെടിക്ക് ഒരു മാസത്തെ വളര്‍ച്ചയുണ്ടെന്ന് എക്‌സൈസ് അധികൃതര്‍ പറഞ്ഞു.
സ്‌കൂള്‍ - കോളജ് വിദ്യാര്‍ഥികള്‍ക്ക് സ്ഥിരമായി കഞ്ചാവ് എത്തിച്ചുകൊടുക്കുന്ന മാഫിയ സംഘത്തിലെ കണ്ണിയാവണ് നിഖിലേഷെന്ന് എക്‌സൈസ് ഉദ്യോഗസ്ഥര്‍ പറഞ്ഞു. അസി. എക്‌സൈസ് ഇന്‍സ്‌പെക്ടര്‍ സി.കെ സൈഫുദ്ദീന്‍, പ്രിവന്റീവ് ഓഫീസര്‍ കെ.ടി സാജു, സിവില്‍ എക്‌സൈസ് ഓഫീസര്‍മാരായ ഗോപാലകൃഷ്ണന്‍, കുഞ്ഞുമുഹമ്മദ്, ശ്രീരാജ്, നന്ദു, ഡ്രൈവര്‍ സക്കീര്‍ ഹുസൈന്‍ എന്നിവരടങ്ങുന്ന സംഘമാണ് പരിശോധനയില്‍ പങ്കെടുത്തത്.