ഒറ്റ രാത്രി കൊണ്ട് സോഷ്യല്‍ മീഡിയയില്‍ താരപരിവേഷം വന്ന വ്യക്തിയാണ് തമിഴ്‌നാടിന്റെ കാവല്‍ മുഖ്യമന്ത്രി. ഒ പനീര്‍ശെല്‍വം. ജയലളിതയുടെ വിധേയനായി കഴിഞ്ഞു അവരുടെ മരണ ശേഷവും നിശബ്ദമായി തമിഴ്‌നാടിനെ നയിച്ച പനീര്‍ശെല്‍വം ശശികലയ്ക്കായി തന്റെ മുഖ്യമന്ത്രിക്കസേരയും വിട്ടു നല്‍കാന്‍ തയ്യാറായി. എന്നാല്‍ ഇന്നലെ പെട്ടന്ന് ജയലളിതയുടെ അന്ത്യവിശ്രമ സ്ഥലത്തെത്തി ധ്യാനനിരതനായി എണീറ്റപ്പോള്‍ തമിഴ്‌നാട് കണ്ടത് പുതിയ ഒരു ഒ.പി.എസിനെയാണ്.

അണ്ണാ ഡി.എം.കെ ജനറല്‍ സെക്രട്ടറി ശശികലക്കെതിരെ വാളെടുത്ത അദ്ദേഹത്തിന്റെ വെളിപ്പെടുത്തലുകള്‍ തമിഴ്‌നാട്ടില്‍ ചലനങ്ങള്‍ സൃഷ്ടിക്കാന്‍ പോന്നതായിരുന്നു. തമിഴകം സോഷ്യല്‍ മീഡിയയിലൂടെ തങ്ങളുടെ പുതിയ തലൈവരെ ഒരുക്കുന്ന തിരക്കിലായിരുന്നു. പൊടുന്നനെയാണ് ഒ.പി.എസിന് താരപരിവേഷം ലഭിച്ചത്.

പനീര്‍ശെല്‍വത്തിന്റെ വെളിപ്പെടുത്തലിനോട് ജനങ്ങള്‍ പലതരത്തില്‍ പ്രതികരിച്ചു. ഭൂരിഭാഗം പേരും സോഷ്യല്‍ മീഡിയകളിലൂടെ തങ്ങളുടെ പ്രതികരണങ്ങള്‍ രേഖപ്പെടുത്തി.

ട്വിറ്ററില്‍ നടത്തിയ ഒരു സര്‍വേയില്‍ പങ്കെടുത്ത ആളുകളില്‍ 95 ശതമാനം പേരും പനീര്‍ശെല്‍വം തന്നെ മുഖ്യമന്ത്രിയായി തുടരണം എന്നു രേഖപ്പെടുത്തി. എന്നിരുന്നാലും പനീര്‍സെല്‍വത്തെ പിന്തുണച്ചും എതിര്‍ത്തും നിരവധി ചര്‍ച്ചകളും അഭിപ്രായപ്രകടനങ്ങളുമാണ് സോഷ്യല്‍ മീഡിയയില്‍ ഇപ്പോള്‍ നടക്കുന്നത്.