പാലക്കാട്:തിരുവിഴാംകുന്ന് സര്‍ക്കാര്‍ കന്നുകാലി ഗവേഷണകേന്ദ്രത്തിലെ14 ജീവനക്കാര്‍ക്ക് ബ്രൂസിലോസിസ് രോഗബാധ സ്ഥിരീകരിച്ചിട്ടുണ്ടെങ്കില്‍ അതേക്കുറിച്ച് വിശദീകരിക്കേണ്ടതും ചികിത്സ നല്‍കേണ്ടതും ആരോഗ്യവകുപ്പാണെന്ന് ഗവേഷണകേന്ദ്രം മേധാവി ഡോ.ഷിബു സൈമണ്‍. രോഗം മൃഗങ്ങളില്‍ വന്നതിനെക്കുറിച്ചാണെങ്കില്‍ മാത്രമാണ് തനിക്ക് വിശദീകരണം നല്‍കാനാകുക. ഇത് മനുഷ്യരിലേക്ക് പകര്‍ന്നിട്ടുണ്ടെങ്കില്‍ ആര്‍ക്കൊക്കെയാണെന്നും അവര്‍ക്ക് എന്ത് ചികിത്സയാണ് നടത്തുന്നതെന്നുമെല്ലാം വിശദീകരിക്കേണ്ടത് ആരോഗ്യവകുപ്പാണെന്നും അദ്ദേഹം പറഞ്ഞു.

സുപ്രഭാതത്തില്‍ വന്ന വാര്‍ത്തയോട് പ്രതികരിക്കുകയായിരുന്നു അദ്ദേഹം. ജീവനക്കാര്‍ക്ക് രോഗം പകര്‍ന്ന വിവരം തന്നെ ആരും അറിയിച്ചിട്ടില്ലെന്നും ഡോ.സൈമണ്‍ കൂട്ടിച്ചേര്‍ത്തു. അതേസമയം ആര്‍ക്കൊക്കെയാണ് രോഗബാധയുള്ളതെന്ന കാര്യം ചുരുങ്ങിയത് രോഗം ബാധിച്ചവരേയെങ്കിലും അറിയിക്കണമെന്ന് ഡി.സി.സി അധ്യക്ഷന്‍ വി.കെ ശ്രീകണ്ഠന്‍ ആവശ്യപ്പെട്ടു.

ഇക്കാര്യം മറച്ചുവെക്കുന്ന ആരോഗ്യവകുപ്പിന്റെ നടപടി മനുഷ്യത്വരഹിതവും മനുഷ്യാവകാശ ലംഘനവുമാണ്. സുപ്രഭാതത്തില്‍ വന്ന വെളിപ്പെടുത്തലുകള്‍ ഗൗരവമുള്ളതാണ്. ഇക്കാര്യത്തില്‍ വസ്തുത വെളിപ്പെടുത്താത്ത കാലത്തോളം എല്ലാ ജീവനക്കാരും കുടുംബാംഗങ്ങളും ആശങ്കയുടെ മുള്‍മുനയില്‍ നില്‍ക്കേണ്ടി വരും.

രോഗം വന്നവര്‍ക്ക് എന്ത് ചികിത്സയാണ് നല്‍കുന്നതെന്നും മറ്റുള്ളവര്‍ക്ക് രോഗം വരാതിരിക്കാന്‍ എന്തെല്ലാം മുന്‍കരുതലുകള്‍ ബന്ധപ്പെട്ടവര്‍ സ്വീകരിച്ചുവെന്നും ആരോഗ്യവകുപ്പ് വിശദീകരിക്കണം. അല്ലാത്ത പക്ഷം ഫാമിലെ തൊഴിലാളികളും കുടുംബാംഗങ്ങളും അടക്കം വലിയ ജനകീയ പ്രക്ഷോഭത്തിന് തങ്ങള്‍ ഒരുങ്ങുമെന്നും ഡി.സി.സി അധ്യക്ഷന്‍ അറിയിച്ചു.

ഇന്നലെ വൈകുന്നേരം വരേയും ആരോഗ്യവകുപ്പ് രോഗത്തെക്കുറിച്ച് രോഗികളായ ജീവനക്കാരെ അറിയിച്ചിട്ടില്ല. രോഗകാര്യം അറിഞ്ഞാല്‍ രോഗം ഉള്ളവരും ഇല്ലാത്തവരുമായ ജീവനക്കാര്‍ ജോലിയില്‍ നിന്നും കൂട്ടത്തോടെ മാറിനില്‍ക്കുമോയെന്ന ആശങ്കയുള്ളതുകൊണ്ടാണ് ഇക്കാര്യം അറിയിക്കാത്തതെന്നാണ് ആരോഗ്യവകുപ്പില്‍ നിന്നും ലഭിക്കുന്ന അനൗദ്യോഗിക വിശദീകരണം. അങ്ങനെ സംഭവിച്ചാല്‍ ഫാമിലെ ഉരുക്കള്‍ പട്ടിണിയിലാകും. ദൈനദിന പ്രവര്‍ത്തനങ്ങള്‍ താളം തെറ്റും. എന്നതിനാലാണ് ഇത്തരമൊരു നിലപാട് സ്വീകരിച്ചതെന്നും ബന്ധപ്പെട്ടവര്‍ ആവര്‍ത്തിക്കുന്നു.

നേരത്തെ ഫാമിലെ മൃഗങ്ങളില്‍ രോഗബാധ സ്ഥിരീകരിച്ചതിനെതുടര്‍ന്ന് 100 ഓളം ജീവനക്കാരില്‍ ആരോഗ്യവകുപ്പ് പരിശോധനകള്‍ നടത്തിയിരുന്നു. മൃഗങ്ങളെ പരിപാലിക്കുന്ന മുഴുവന്‍ ജീവനക്കാരുടേയും രക്തസാംപിളുകള്‍ മണിപ്പാലിലെ ലബോറട്ടറിയിലേക്ക് അയച്ച് പരിശോധനകള്‍ നടത്തിയിരുന്നു.
എന്നാല്‍ ആദ്യഘട്ടത്തില്‍ രോഗ ലക്ഷണം പ്രകടിപ്പിക്കാത്തവരിലാണ് ഇപ്പോള്‍ തുടര്‍ പരിശോധനകളിലൊന്നില്‍ രോഗബാധ സ്ഥിരീകരിച്ചിരിക്കുന്നത്. ഏതാനും ദിവസങ്ങള്‍ക്കു മുന്‍പ് ചില ജീവനക്കാരുടെ രക്തസാംപിളില്‍ ബ്രൂസെല്ലാ ബാക്ടീരിയ ആന്റിബോഡി കണ്ടെത്തിയതിനെ തുടര്‍ന്ന് രക്തം കൂടുതല്‍ പരിശോധനകള്‍ക്ക് വിധേയമാക്കുകയായിരുന്നു. ഇവരിലാണ് രോഗം സ്ഥിരീകരിച്ചിട്ടുള്ളത്.