കാട്ടാക്കട: ബൈക്ക് യാത്രികനെ രക്ഷിക്കുന്നതിനിടെ നിയന്ത്രണം വിട്ട ടിപ്പര്‍ ലോറി കടകളിലേയ്ക്ക് ഇടിച്ചുകയറി.അപകടത്തില്‍ വിദ്യാര്‍ഥികളും വഴിയാത്രക്കാരും ഉള്‍പ്പടെ രക്ഷപ്പെട്ടത് തലനാരിഴയ്ക്ക്. ബൈക്ക് യാത്രികന്‍ അഞ്ചു തെങ്ങിന്‍ മൂട് അദ്വൈതത്തില്‍ കെ.എസ് സജി (42)ക്ക് പരുക്കേറ്റു. ഇയാളെ മെഡിക്കല്‍കോളജ് ആശുപത്രിയിലും പിന്നീട് നഗരത്തിലെ സ്വകാര്യ ആശുപത്രിയിലും പ്രവേശിപ്പിച്ചു. കാട്ടാക്കട-ബാലരാമപുരം റോഡില്‍ തൂങ്ങാംപാറ ജങ്ഷനില്‍ ഇന്നലെ രാവിലെ ഏഴരയോടെയായിരുന്നു അപകടം.
കടയുടെ മുന്നില്‍ നിന്ന പതിനഞ്ചോളം വിദ്യാര്‍ഥികള്‍ ബസില്‍ കയറി പോയി നിമിഷങ്ങള്‍ കഴിഞ്ഞപ്പോഴായിരുന്നു അപകടം. തൂങ്ങാപാറ ജങ്ഷനിലെ പുഷ്പയുടെ ചായക്കട, ബിജുവിന്റെ സ്റ്റോര്‍ കട എന്നിവയാണ് ടിപ്പര്‍ ഇടിച്ചുതകര്‍ത്തത്. കാട്ടാക്കട അഗ്‌നിശമന സേനാവിഭാഗം സ്ഥലത്തെത്തി രക്ഷാ പ്രവര്‍ത്തനങ്ങള്‍ നടത്തി.സേനാ ഉദ്യോഗസ്ഥരായ സുരേഷ്‌കുമാര്‍, പത്മകുമാര്‍, സുനില്‍കുമാര്‍, ശ്രീജിത്ത് എന്നിവരാണ് രക്ഷാ പ്രവര്‍ത്തനങ്ങള്‍ക്ക് നേതൃത്വം നല്‍കിയത്.