വാഷിങ്ടണ്‍: മാധ്യമ രാജാവ് റൂപര്‍ട്ട് മര്‍ഡോക്കിന്റെ മുന്‍ഭാര്യയെക്കുറിച്ച് എഫ്.ബി.ഐ ട്രംപിന്റെ മരുമകന്‍ ജാരദ് കുഷ്‌നര്‍ക്ക് മുന്നറിയിപ്പ് നല്‍കിയിരുന്നതായി റിപ്പോര്‍ട്ട്. ചൈനക്കാരിയായ വെന്‍ഡി ഡങ് മര്‍ഡോക്ക് ആണ് റൂപര്‍ട്ട് മര്‍ഡോക്കിന്റെ മുന്‍ഭാര്യ. കുഷ്‌നറുമായും ഭാര്യ ഇവാന്‍കയുമായും അടുത്ത സൗഹൃദമുള്ള വെന്‍ഡി ഡങ് ഈ ബന്ധം ചൈനയെ സഹായിക്കാന്‍ ഉപയോഗപ്പെടുത്തുമെന്നായിരുന്നു എഫ്.ബി.ഐയുടെ മുന്നറിയിപ്പ്.
വാള്‍സ്ട്രീറ്റ് ജേണലാണ് കഴിഞ്ഞ ദിവസം ഇക്കാര്യം റിപ്പോര്‍ട്ട് ചെയ്തത്. ചൈനീസ് അമേരിക്കന്‍ ബിസിനസ്‌കാരിയും യു.എസ് പൗരത്വമുള്ളയാളുമാണ് വെന്‍ഡി ഡങ്. 100 മില്യണ്‍ യു.എസ് ഡോളറില്‍ ചൈനയുടെ ഫണ്ടോടു കൂടി വാഷിങ്ടണില്‍ ദേശീയ മാതൃകാതോട്ടം നിര്‍മിക്കുന്നതിനായി ഫണ്ട് ആവശ്യപ്പെട്ട് ഡങ് ചൈനീസ് സര്‍ക്കാരിനെ സമീപിക്കുമെന്നും എഫ്.ബി.ഐ മുന്നറിയിപ്പ് നല്‍കിയതായി റിപ്പോര്‍ട്ടില്‍ പറയുന്നു. യു.എസുമായി ഇത്തരം ബന്ധങ്ങള്‍ക്കു ശ്രമിക്കുന്നവരെ കുഷ്‌നര്‍ തിരിച്ചറിയണമെന്ന് എഫ്.ബി.ഐ പറയുന്നതായും റിപ്പോര്‍ട്ടിലുണ്ട്.