ചെങ്ങന്നൂര്‍: അമേരിക്കന്‍ മലയാളികളായ അച്ഛന്റെയും മകന്റെയും തിരോധാനവും തുടര്‍ന്ന് മകന്‍ പിതാവിനെ കൊലപ്പെടുത്തി മുങ്ങിയതാണെന്ന അഭ്യൂഹവും ചെങ്ങന്നൂര്‍ നഗരത്തെ പരിഭ്രാന്തിയിലാക്കി. ചെങ്ങന്നൂര്‍ വാഴാര്‍മംഗലം ഉഴത്തില്‍ വീട്ടില്‍ ജോയ് ജോണ്‍ (68),മകന്‍ ഷെറിന്‍ ജോണ്‍ (36) എന്നിവരെയാണ് കാണാതായത്.അതേ സമയം മകന്‍ പൊലീസ് പിടിയിലായതായി സൂചനയുണ്ട്.   
ഇന്നലെ രാവിലെ എട്ടു മണിയോടെ വന്‍ പൊലീസ് സന്നാഹമാണ് വാഴാര്‍മംഗലം ഉഴത്തില്‍ ജോയിജോണിന്റെ നഗരമധ്യത്തിലെ ഇവരുടെ ബഹുനില മന്ദിരത്തിന്റെ മുന്നിലെത്തിയത്. കാക്കിധാരികള്‍ക്കൊപ്പം വിവിധ ശാസ്ത്രീയ പരിശോധനാ സംഘവും ഡോഗ് സ്‌ക്വാഡും എത്തിയപ്പോഴാണ് വിവരം നാട്ടുകാര്‍ അറിയുന്നത്. മാത്രമല്ല പൊലീസ് പമ്പാനദിയിലും ജോയിജോണിനായി തെരച്ചില്‍ ആരംഭിച്ചു.
ഇക്കഴിഞ്ഞ 26നാണ് തന്റെ ഭര്‍ത്താവിനെയും മൂത്തമകനേയും കാണാനില്ലെന്നു കാട്ടി  മറിയാമ്മ ചെങ്ങന്നൂര്‍ പൊലീസില്‍ പരാതി നല്‍കിയത്. തുടര്‍ന്നുള്ള അന്വേഷണത്തിന്റെ ഭാഗമായാണ് ഇവുരടെ ഈ കെട്ടിടത്തിലും പരിശോധന നടത്തിയത്. കെട്ടിടത്തിന്റെ താഴത്തെ നിലയില്‍ കാര്‍പാര്‍ക്കിംഗ് ഏരിയായും ഗോഡൗണുമാണ് ഉള്ളത്.          
റോഡിന് അഭിമുഖമായുള്ള ഈ ഭാഗം ഷട്ടറിട്ടുകഴിഞ്ഞാല്‍ പകല്‍ പോലും അകത്തു നടക്കുന്ന വിവരം പുറംലോകം അറിയുകയില്ല. ജോയിജോണിന്റെ കുടുംബത്തില്‍ രണ്ട് ആഡംബര കാറുകളാണ് ഉള്ളത്. ഒരെണ്ണം സ്‌ക്വാഡയും മറ്റൊന്ന് ഹ്യുണ്ടായിയുമാണ്. പൊലീസ് പരിശോധനക്ക് എത്തുമ്പോള്‍ ഹ്യുണ്ടായി കാര്‍ മാത്രമണ് ഗോഡൗണില്‍ ഉണ്ടായിരുന്നത്. കഴിഞ്ഞ 19നാണ് ജോയിജോണും ഭാര്യ മറിയാമ്മയും ഇളയ മകനായ ഡോ. ഡേവിഡും അമേരിക്കയില്‍ നിന്നും നാട്ടിലെത്തിയത്. ഇടദിവസങ്ങളില്‍ ജോയിയും മകന്‍ ഷെറിനും നഗരത്തിലെ കെട്ടിടത്തില്‍ എത്തുകയും വാഹനം പാര്‍ക്ക് ചെയ്ത് പുറത്തുപോകുകയും ചെയ്യുന്നത് പതിവായിരുന്നു.  
2010ല്‍ ഷെറിന്റെ വിവാഹം ചെന്നൈ സ്വദേശിനിയായ ഒരു യുവതിയുമായി ആര്‍ഭാടപൂര്‍വ്വം ചെങ്ങന്നൂരില്‍ വെച്ച് നടത്തി. എന്നാല്‍ ഒരു വര്‍ഷത്തിനുശേഷം ഇവര്‍ വേര്‍പിരിഞ്ഞതായും വിവാഹബന്ധം നിയമപരമായി വേര്‍പെടുത്തിയതായും പറയപ്പെടുന്നു. ഇതിനുശേഷം അച്ഛനും മകനുമായി അഭിപ്രായ ഭിന്നത നിലനിന്നിരുന്നതായും ഇടക്കിടെ വഴക്കുണ്ടാകാറുണ്ടെന്നും കുടുംബാംഗങ്ങള്‍ പറഞ്ഞു. കാണാതായ ശേഷം ഷെറിന്‍ അമ്മയോട് ഫോണില്‍ പിതാവുമായി വഴക്കടിച്ചതും അബദ്ധം പറ്റിയതായും പറഞ്ഞശേഷം ഫോണ്‍ സ്വിച്ച് ഓഫ് ചെയ്തതാണ് വീട്ടുകാര്‍ ഉടന്‍തന്നെ പൊലീസില്‍ വിവരമറിയിക്കാന്‍ കാരണമായത്. വിവാഹശേഷം ഐ.ടി വിദഗ്ധനായ ഷെറില്‍ അമേരിക്കയിലേക്ക് തിരിച്ചുപോയില്ല. അമേരിക്കയിലും ഷെറിന്‍ ചില കുഴപ്പങ്ങള്‍ ഉണ്ടാക്കിയ ശേഷണാണ് നാട്ടിലേക്ക് മടങ്ങിയതെന്നും പറയപ്പെടുന്നു. പൊലീസിന് പരാതി ലഭിച്ചതിനുശേഷവും ഷെറിന്‍ ചെങ്ങന്നൂര്‍, തിരുവല്ല എന്നിവിടങ്ങളിലുണ്ടായിരുന്നതായി പൊലീസിന് വിവരം ലഭിച്ചു. ഇതിന്റെ അടിസ്ഥാനത്തില്‍ അന്വേഷണം ഊര്‍ജ്ജിതമാക്കിയതോടെയാണ് ഷെറിന്‍ ഒളിവിലേക്ക് പോയതെന്നും പൊലീസ് സംശയിക്കുന്നു. അതി സമ്പന്നരായ അച്ഛന്റെയും മകന്റെയും ദുരൂഹ തിരോധാനവും കൊലപാതകമാണെന്ന അഭ്യൂഹവും ചെങ്ങന്നൂരിനെ വീണ്ടും പരിഭ്രാന്തിയിലാക്കിയിരിക്കുകയാണ്.