ഒറ്റപ്പാലം: ലക്കിടി ജവഹര്‍ലാല്‍ നെഹ്‌റു കോളജില്‍ വിദ്യാര്‍ഥിയുടെ ആത്മഹത്യാശ്രമം. പാലക്കാട് പിരിയാരി പള്ളിക്കുളം അഷ്‌റഫിന്റെ മകന്‍ അര്‍ഷാദ് (20) ആണ് ക്ലാസ്മുറിയില്‍ വിഷം കഴിച്ച് ആത്മഹത്യയ്ക്ക് ശ്രമിച്ചത്. ലോ കോളജിലെ ഒന്നാം വര്‍ഷ വിദ്യാര്‍ഥിയാണ് അര്‍ഷാദ്. ഡിസംബര്‍ 21ന് അധ്യാപകരോട് അപമര്യാദയായി പെരുമാറിയതിന്റെ പേരില്‍ സസ്‌പെന്‍ഷനിലായ അര്‍ഷാദിനെ ചൊവ്വാഴ്ച തിരിച്ചെത്തിയപ്പോള്‍ ക്ലാസില്‍ നിന്ന് പുറത്താക്കിയിരുന്നു.
ഇന്നലെ അര്‍ഷാദ് ക്ലാസില്‍ സമ്മതമില്ലാതെ കയറിയിരിക്കുകയും അധ്യാപകന്‍ ക്ലാസെടുക്കാതെ ഇറങ്ങി പോവുകയും ചെയ്തു. ഇതേതുടര്‍ന്നാണ് ഇയാള്‍ ക്ലാസില്‍ എലിവിഷം കഴിച്ച് ആത്മഹത്യയ്ക്ക് ശ്രമിച്ചത്. അര്‍ഷദിനെ കണ്ണിയംപുറത്തെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. ക്ലാസില്‍ മദ്യം കൊണ്ടുവന്നുവെന്നാരോപിച്ച് മറ്റു രണ്ടു വിദ്യാര്‍ഥികളെ കൂടി കോളജ് അധികൃതര്‍ സസ്‌പെന്‍ഡ് ചെയ്തിരുന്നു.
സംഭവത്തെത്തുടര്‍ന്ന് ഇന്ന് വൈകിട്ട് മൂന്നു മണിക്ക് കോളജില്‍ ചര്‍ച്ച നടത്താന്‍ തീരുമാനിച്ചിട്ടുണ്ട്. ഷൊറണ്ണൂരിന്റെ ചുമതലയുള്ള അഗളി ഡിവൈ.എസ്.പി പി.കെ സുബ്രഹ്മണ്യന്‍, ഒറ്റപ്പാലം സി.ഐ പി അബ്ദുല്‍ മുനീര്‍, കോളജ് അധികൃതര്‍, വിദ്യാര്‍ഥി നേതാക്കള്‍ പങ്കെടുക്കും.