കാസര്‍കോട്: കീഴൂരിലെ വീട് കുത്തിത്തുറന്ന് ആറരപവനോളം സ്വര്‍ണം കവരുകയും രണ്ടു വീടുകളില്‍ കവര്‍ച്ചാശ്രമം നടത്തുകയും ചെയ്ത സംഭവത്തില്‍ പൊലിസ് അന്വേഷണം ഊര്‍ജിതമാക്കി. മൂന്നുപേരാണു കവര്‍ച്ചാസംഘത്തിലുണ്ടായിരുന്നതെന്നു പൊലിസിനു വിവരം ലഭിച്ചു.
കീഴൂര്‍ ടൗണിലെ ആശുപത്രിയുടെ സി.സി ടി.വിയില്‍ ഇവരുടെ ദൃശ്യങ്ങള്‍ പതിഞ്ഞിട്ടുണ്ട്. പുലര്‍ച്ചെ മൂന്നേകാലോടെ മൂന്നുപേര്‍ ഓടിപ്പോകുന്നതാണ് ദൃശ്യങ്ങളിലുള്ളത്. ട്രൗസര്‍ മാത്രമണിഞ്ഞ് ഓടുന്ന ദൃശ്യമാണുള്ളത്.
പൊലിസ് നായ കവര്‍ച്ച നടന്ന വീടുകളില്‍ നിന്നു മണംപിടിച്ച് കീഴൂര്‍ ടൗണ്‍ വരെ ഓടിയിരുന്നു. കീഴൂര്‍ പടിഞ്ഞാറിലെ ബി.എച്ച് നാസറിന്റെ വീടിന്റെ അടുക്കള വാതില്‍ പൊളിച്ചാണ് ആറരപവന്‍ ആഭരണങ്ങള്‍ കവര്‍ന്നത്. സമീപത്തെ ഒ.എം ഇബ്രാഹിം, നാസര്‍ എന്നിവരുടെ വീടുകളിലും കവര്‍ച്ചാശ്രമം നടന്നിരുന്നു. സംഭവത്തില്‍ ബേക്കല്‍ എസ്.ഐ വി.പിന്റെ നേതൃത്വത്തിലാണ് അന്വേഷണം പുരോഗമിക്കുന്നത്.