ന്യൂഡല്‍ഹി: സിക്കിം അതിര്‍ത്തിയോട് ചേര്‍ന്നുള്ള ദോക്‌ലാമില്‍ ചൈനയുടെ വന്‍ സൈനിക സന്നാഹം. ഇതിന്റെ ഉപഗ്രഹദൃശ്യങ്ങള്‍ പുറത്ത് വന്നു. 70 ദിവസത്തോളം സംഘര്‍ഷം നിലനിനിന്നിരുന്ന ദോക്‌ലാം തര്‍ക്കഭൂമിയിലാണ് ചൈന ഇപ്പോള്‍ സൈനിക സന്നഹം വര്‍ധിപ്പിച്ചിരിക്കുന്നത്.

വടക്കന്‍ ദോക്‌ലാം പൂര്‍ണമായും കൈയ്യേറി ചൈന സായുധവാഹനങ്ങള്‍ വിന്യസിച്ചതായും ഉയരംകൂടിയ നിരീക്ഷണ ടവറുകളും സ്ഥാപിച്ചതായുമാണ് റിപ്പോര്‍ട്ട്. ഡിസംബര്‍ രണ്ടാം വാരം പകര്‍ത്തിയ ഉപഗ്രഹദൃശ്യങ്ങളിലാണ് ഇക്കാര്യം വ്യക്തമാകുന്നത്.

ഇന്ത്യന്‍ സേനാ പോസ്റ്റില്‍ നിന്ന് 80 മീറ്റര്‍ അകലെ, ഏഴ് ഹെലിപ്പാഡുകള്‍, ആയുധപ്പുര, കോണ്‍ക്രീറ്റ് കെട്ടിടങ്ങളും പത്തു കിലോമീറ്റര്‍ ദൈര്‍ഘ്യമുള്ള റോഡും ചൈന നിര്‍മിച്ചിട്ടുണ്ട്. മാത്രമല്ല, ആയുധസജ്ജമായ വാഹനങ്ങളും നിലയുറപ്പിച്ചിട്ടുണ്ട്. ഭൂട്ടാനുമായുള്ള തര്‍ക്ക മേഖലയിലാണു ചൈന പടയൊരുക്കം നടത്തുന്നതെന്നു ദൃശ്യങ്ങള്‍ സൂചിപ്പിക്കുന്നു.

ഭൂട്ടാനുമായുള്ള തര്‍ക്കമേഖലയില്‍ കടന്നുകയറി റോഡ് നിര്‍മ്മിക്കാനുള്ള ചൈനയുടെ ശ്രമം ഇന്ത്യ തടഞ്ഞതിനെ തുടര്‍ന്നാണ് കഴിഞ്ഞ വര്‍ഷം ഇരു രാജ്യങ്ങളും തമ്മില്‍ ദീര്‍ഘനാള്‍ നീണ്ടുനിന്ന സംഘര്‍ഷമുണ്ടായത്. പിന്നീട് നടന്ന ഉഭയകക്ഷി ചര്‍ച്ചയ്ക്കു ശേഷമാണ് ഇരുരാജ്യങ്ങളും സൈന്യത്തെ പിന്‍വലിച്ചത്.

അതേസമയം, ചൈന മുന്‍പ് നടത്തിയ പോലെ നിര്‍മിച്ച താല്‍ക്കാലിക സംവിധാനങ്ങളാണ് ഇവയെന്നും സൂചനയുണ്ട്. പ്രദേശത്തു ചൈനയുടെ താല്‍ക്കാലിക സംവിധാനങ്ങള്‍ ഇപ്പോഴുമുണ്ടെന്നും ശൈത്യകാലം കഴിഞ്ഞാല്‍ ചൈനീസ് സൈന്യം ഇവിടേക്ക് മടങ്ങിയെത്താന്‍ സാധ്യതയുണ്ടെന്നും കരസേനാമേധാവി ജനറല്‍ ബിപിന്‍ റാവത്ത് കഴിഞ്ഞ ദിവസം ചൂണ്ടിക്കാട്ടിയിരുന്നു.വേണ്ടിവന്നാല്‍ നേരിടാന്‍ ഇന്ത്യന്‍ സൈനികര്‍ തയ്യാറാണെന്നും അദ്ദേഹം വ്യക്തമാക്കിയിരുന്നു.