കാസര്‍കോട്: ജില്ലയില്‍ രണ്ടിടങ്ങളില്‍ നടത്തിയ കഞ്ചാവ് വേട്ടയില്‍ വിദ്യാര്‍ഥികള്‍ ഉള്‍പ്പെടെ നാല് പേര്‍ പിടിയിലായി. ജില്ലാ അതിര്‍ത്തിയായ തലപ്പാടിയിലും കാസര്‍കോട്ടും പൊലിസ് നടത്തിയ പരിശോധനയില്‍ 14.250 കിലോ ഗ്രാം കഞ്ചാവും 1.60 ലക്ഷം രൂപയുമാണ് പിടിച്ചെടുത്തത്.
കാസര്‍കോട് നഗരത്തില്‍ പൊലിസ് നടത്തിയ പരിശോധനയില്‍ ബൈക്കില്‍ സഞ്ചരിക്കുകയായിരുന്ന രണ്ട് വിദ്യാര്‍ഥികളെ രണ്ട് കിലോ കഞ്ചാവുമായി പിടികൂടുകയായിരുന്നു. കാസര്‍കോട് ഗവ.കോളജിലെ ബി.എ.മൂന്നാം വര്‍ഷ വിദ്യാര്‍ഥി ഇരിട്ടി ആറളം മറ്റപള്ളി ഹൗസിലെ ഷാന്‍ സെബാസ്റ്റ്യന്‍ (20) മംഗളൂരുവിലെ സ്വകാര്യ കോളജില്‍ ഫിസിയോ തെറാപ്പി വിദ്യാര്‍ഥിയായ ഇരിട്ടി അയ്യംകുന്ന് വടക്കുംകര ഹൗസിലെ ഡൊണാള്‍ഡ് കുഞ്ഞുമോന്‍ (20) എന്നിവരേയാണ് അറസ്റ്റു ചെയ്തത്. ഇന്നലെ വൈകുന്നേരം അണങ്കൂരില്‍ വച്ചാണ് ഇവരെ കാസര്‍കോട് പ്രിന്‍സിപ്പല്‍ എസ്.ഐ.അജിത്കുമാര്‍, എസ്.ഐ.ഗംഗാധരന്‍ എന്നിവരുടെ നേതൃത്വത്തിലുള്ള സംഘം പിടികൂടിയത്. സംഘത്തിലെ മറ്റൊരാള്‍ ഓടി രക്ഷപ്പെട്ടു. ഇവര്‍ സഞ്ചരിച്ച ബൈക്കും പൊലിസ് കസ്റ്റഡിയിലെടുത്തു. പിടിക്കപ്പെട്ട വിദ്യാര്‍ഥികളില്‍ ഒരാള്‍ പ്രമുഖ വിദ്യാര്‍ഥി യൂനിയന്‍ നേതാവാണെന്ന് സൂചനയുണ്ട്.
വിദ്യാര്‍ഥികളില്‍ നിന്ന് കഞ്ചാവ് പിടിച്ചെടുത്തതിനെ തുടര്‍ന്ന് കാസര്‍കോട് പൊലിസ് ജില്ലയുടെ വിവിധ ഭാഗങ്ങളില്‍ ഇന്നലെ റെയ്ഡ് നടത്തി. കാസര്‍കോട് ആര്‍.ഡി.ഒയുടെ അനുമതിയോടെയാണ് ഇന്നലെ രാത്രി റെയ്ഡ് നടന്നത്.
തലപ്പാടിക്കു സമീപം കേരള കര്‍ണാടക അതിര്‍ത്തിയായ നെക്കിലപദവില്‍ മംഗഌരു ആന്റി റൗഡി സ്‌ക്വാഡ് നടത്തിയ തിരച്ചിലിലാണ് സ്‌കൂട്ടറില്‍ കടത്തുകയായിരുന്ന കഞ്ചാവ് പിടിച്ചെടുത്തത്. തവിടുഗോളി, നരിക്കാന സ്വദേശി മുഹമ്മദ് അസീസ് (24), തലപ്പാടി, മുള്ളുഗുഡ്ഡയിലെ ഇംതിയാസ്(26) എന്നിവരാണ് അറസ്റ്റിലായത്. ഇവര്‍ മംഗളൂരുവിലേക്ക് കഞ്ചാവ് കടത്തുന്നതിനിടയിലാണ് പിടിയിലായത്. 12.250 കിലോ ഗ്രാം കഞ്ചാവും 1.60 ലക്ഷം രൂപയുമാണ് ഇവരില്‍ നിന്ന് പൊലിസ് പിടിച്ചെടുത്തത്.