ബംഗളൂരു: സന്തോഷ് ട്രോഫി ദക്ഷിണ മേഖലാ യോഗ്യതാ പോരാട്ടത്തിന്റെ ആദ്യ മത്സരത്തില്‍ കേരളത്തിന് തകര്‍പ്പന്‍ ജയം. മറുപടിയില്ലാത്ത ഏഴ് ഗോളുകള്‍ക്ക് കേരളം ആന്ധ്രാപ്രദേശിനെ തകര്‍ത്തു.
രാഹുല്‍ കെ.പി, അഫ്ദല്‍ എന്നിവര്‍ ഇരട്ട ഗോളുകള്‍ നേടിയപ്പോള്‍ ഒരു ഗോള്‍ ആന്ധ്രയുടെ വക സെല്‍ഫായിരുന്നു. സജിത് പൗലോസ്, വിബിന്‍ തോമസ് എന്നിവര്‍ ഓരോ ഗോളും വലയിലാക്കി. മത്സരത്തിന്റെ ആദ്യ പകുതിയില്‍ മൂന്നും രണ്ടാം പകുതിയില്‍ നാലും ഗോളുകളാണ് ആന്ധ്രയുടെ വലയില്‍ കയറിയത്.
കളി തുടങ്ങി മൂന്നാം മിനുട്ടില്‍ തന്നെ കേരളം വല ചലിപ്പിച്ചു. വലത് വിങില്‍ നിന്നുള്ള ജിതിന്റെ മുന്നേറ്റമാണ് ഗോളില്‍ കലാശിച്ചത്. ജിതിന്‍ നല്‍കിയ ക്രോസില്‍ നിന്ന് സജിത് പൗലോസാണ് കേരളത്തിനായി വല ചലിപ്പിച്ചത്. 13ാം മിനുട്ടില്‍ അടുത്ത ഗോള്‍. രാഹുല്‍ കെ.പി അഫ്ദല്‍ നല്‍കിയ ക്രോസില്‍ നിന്ന് കേരളത്തിന് രണ്ടാം ഗോള്‍ സമ്മാനിക്കുകയായിരുന്നു. മൂന്ന് മിനുട്ടിനുള്ളില്‍ ആന്ധ്ര താരം സിംഗപള്ളി വിനോദിന്റെ സെല്‍ഫ് ഗോള്‍ കേരളത്തിന്റെ ലീഡുയര്‍ത്തി. ഇടവേളയ്ക്ക് പിരിയുമ്പോള്‍ കേരളം 3-0ത്തിന് മുന്നില്‍.
രണ്ടാം പകുതി തുടങ്ങിയതും കേരളം ആക്രമണം ആരംഭിച്ചു. നാല് മിനുട്ടിനുള്ളില്‍ അതിന്റെ ഫലവും എത്തി. തന്റെ രണ്ടാം ഗോളിലൂടെ രാഹുല്‍ കേരളത്തിന്റെ സ്‌കോര്‍ നില നാലിലെത്തിച്ചു. 52ാം മിനുട്ടില്‍ വിബിന്‍ തോമസിലൂടെ കേരളം അഞ്ചിലെത്തി. ഫ്രീ കിക്കിലൂടെയാണ് വിബിന്‍ വല ചലിപ്പിച്ചത്. ഒടുവില്‍ 62, 75 മിനുട്ടുകളില്‍ വല ചലിപ്പിച്ച് അഫ്ദല്‍ ഇരട്ട ഗോള്‍ നേട്ടത്തിലൂടെ കേരളത്തിന്റെ പട്ടിക ഏഴിലെത്തിച്ചു. രണ്ട് ഗോളുകള്‍ക്കും വഴിയൊരുങ്ങിയത് മുഹമ്മദ് ഷരീഫിന്റെ അസിസ്റ്റില്‍ നിന്നായിരുന്നു.
ഈ മാസം 22ന് തമിഴ്‌നാടുമായാണ് കേരളത്തിന്റെ രണ്ടാം പോരാട്ടം. കേരളത്തിനൊപ്പം ബി ഗ്രൂപ്പിലുണ്ടായിരുന്ന ആന്‍ഡമാന്‍ നിക്കോബാര്‍ ടീം ടൂര്‍ണമെന്റില്‍ നിന്ന് പിന്‍മാറിയിരുന്നു. ഗ്രൂപ്പ് പോരാട്ടത്തില്‍ ഒന്നാം സ്ഥാനത്തെത്തുന്ന ടീമിനാണ് ഫൈനല്‍ റൗണ്ടിലേക്ക് യോഗ്യത ലഭിക്കുന്നത്.