തിരുവനന്തപുരം: രാജ്യത്തെ മെഡിക്കല്‍ കോളജുകളിലെ ക്ലാസ് മുറികളിലും ക്ലിനിക്കല്‍ പരിശീലനം നല്‍കുന്ന വാര്‍ഡുകളിലും സി.സി.ടി.വി കാമറ നിര്‍ബന്ധമാക്കണമെന്ന് മെഡിക്കല്‍ കൗണ്‍സില്‍ ഓഫ് ഇന്ത്യയുടെ നിര്‍ദേശം. കൂടാതെ അധ്യാപകര്‍ക്ക് ബയോ മെട്രിക് ഫിംഗര്‍ പ്രിന്റ് പഞ്ചിങ് സംവിധാനം കര്‍ശനമാക്കാനും തീരുമാനിച്ചു.
കഴിഞ്ഞ തിങ്കളാഴ്ച കൂടിയ മെഡിക്കല്‍ കൗണ്‍സില്‍ ഓഫ് ഇന്ത്യയുടെ എത്തിക്‌സ് കമ്മിറ്റിയാണ് തീരുമാനമെടുത്തത്. പല മെഡിക്കല്‍ കോളജുകളും അധ്യാപകരുടെ തെറ്റായ വിവരം നല്‍കിയതായി മെഡിക്കല്‍ കൗണ്‍സിലിന്റെ അന്വേഷണത്തില്‍ കണ്ടെത്തിയിരുന്നു. ഇതേ തുടര്‍ന്നാണ് മെഡിക്കല്‍ കോളജുകളില്‍ അധ്യാപകര്‍ക്ക് ബയോ മെട്രിക് ഹാജര്‍ പരിശോധന കര്‍ശനമാക്കാന്‍ നിര്‍ദേശം നല്‍കിയത്. എല്ലാ അധ്യാപകരും ഓണ്‍ലൈനില്‍ രജിസ്റ്റര്‍ ചെയ്യണം.
അധ്യാപകരുടെ ഓണ്‍ലൈന്‍ ഹാജര്‍ നില എല്ലാ ദിവസവും എം.സി.ഐ പരിശോധിക്കും. അധ്യാപകരുടെ നിയമനങ്ങളില്‍ എം.സി.ഐ നിര്‍ദേശിച്ചിട്ടുള്ള യോഗ്യത കര്‍ശനമാക്കും. അടുത്ത അധ്യയന വര്‍ഷം മുതല്‍ എല്ലാ മെഡിക്കല്‍ കോളജുകളിലും സി.സി.ടി.വി കര്‍ശനമാക്കും.
മെഡിക്കല്‍ വിദ്യാര്‍ഥികള്‍ക്ക് മികച്ച വിദ്യാഭ്യാസം ഒരുക്കുക എന്നതാണ് പദ്ധതിയുടെ ലക്ഷ്യം. ക്ലാസ് മുറികളിലും, ക്ലിനിക്കല്‍ പരിശീലനം നല്‍കുന്ന വാര്‍ഡുകളിലും അധ്യാപകരുടെ ക്ലാസ് എം.സി.ഐ നേരിട്ട് വിലയിരുത്താന്‍ വേണ്ടിയാണ് കാമറ സജ്ജീകരിക്കാന്‍ നിര്‍ദേശം നല്‍കിയിരിക്കുന്നത്.
കൂടാതെ ഒ.പിയിലെത്തുന്ന രോഗികളെ സംബന്ധിച്ചും മെഡിക്കല്‍ കൗണ്‍സില്‍ മാര്‍ഗ നിര്‍ദേശം നല്‍കി. 100 സീറ്റുകള്‍ ഉള്ള മെഡിക്കല്‍ കോളജുകളില്‍ ദിവസവും 800 ഒ.പി രോഗികളെ നോക്കണമെന്ന് നിര്‍ദേശിച്ചിട്ടുണ്ട്. മെഡിക്കല്‍ കൗണ്‍സിലിന്റെ തീരുമാനത്തെ കേരള ആരോഗ്യ സര്‍വകലാശാല സ്വാഗതം ചെയ്തു.
അടുത്ത അധ്യയന വര്‍ഷം മുതല്‍ സംസ്ഥാനത്തെ എല്ലാ സര്‍ക്കാര്‍ മെഡിക്കല്‍ കോളജുകളിലും നിബന്ധന നടപ്പിലാക്കുമെന്നും സര്‍വകലാശാല അധികൃതര്‍ പറഞ്ഞു. അതേ സമയം, മെഡിക്കല്‍ കൗണ്‍സിലിന്റെ തീരുമാനം പൂര്‍ണമായും നടപ്പിലാക്കാന്‍ കഴിയില്ലായെന്ന് സ്വകാര്യ മെഡിക്കല്‍ കോളജുകള്‍ ചൂണ്ടിക്കാട്ടി.
ക്ലാസ് മുറിയില്‍ സി.സി.ടി.വി സ്ഥാപിക്കാം. എന്നാല്‍ ക്ലിനിക്കല്‍ പരിശീലനം നല്‍കുന്ന വാര്‍ഡുകളില്‍ രോഗികളുടെ സ്വകാര്യത പരിഗണിച്ച് സി.സി.ടി.വി കാമറ സ്ഥാപിക്കാന്‍ കഴിയില്ലെന്നും സ്വകാര്യ മെഡിക്കല്‍ കോളജ് അധികൃതര്‍ പറയുന്നു.