വാഷിങ്ടണ്‍: 2017 ചരിത്രത്തിലെ ഏറ്റവും ചൂടേറിയ വര്‍ഷങ്ങളിലൊന്നെന്ന് ശാസ്ത്രസംഘം. ലോകത്തില്‍ ഏറ്റവും ചൂടേറിയ രണ്ടാമത്തെ വര്‍ഷമാണ് 2017 എന്ന് നാസ പുറത്തിറക്കിയ റിപ്പോര്‍ട്ടില്‍ പറയുന്നുണ്ട്. എന്നാല്‍ നാഷനല്‍ ഓഷ്യാനിക് ആന്‍ഡ് അറ്റ്‌മോസ്ഫിയര്‍ അഡ്മിനിസ്‌ട്രേഷന്റെ റിപ്പോര്‍ട്ട് പ്രകാരം ഏറ്റവും ചൂടേറിയ മൂന്നാമത്തേതാണു കഴിഞ്ഞ വര്‍ഷമെന്നാണു വ്യക്തമാക്കുന്നത്.അന്തരീക്ഷത്തിലെ ഊഷ്മാവിനെ അളക്കാന്‍ വ്യത്യസ്തമായ മാനദണ്ഡങ്ങളാണു രണ്ടു ശാസ്ത്ര ഏജന്‍സികളും ഉപയോഗിച്ചത്. എന്നാല്‍ കഴിഞ്ഞ നാലു വര്‍ഷത്തെ ചൂട് 138 വര്‍ഷത്തിനുള്ളിലുണ്ടായ ഏറ്റവും രൂക്ഷമായതാണെന്നു രണ്ടു സംഘടനകളും വ്യക്തമാക്കി. ഭൂമിയില്‍ സവിശേഷമായ രീതിയില്‍ കഴിഞ്ഞ വര്‍ഷം ചൂട് വര്‍ധിക്കുകയായിരുന്നുവന്ന് നാസയുടെ ബഹിരാകാശ പഠനകേന്ദ്രം അറിയിച്ചു.