കണ്ണൂര്‍: വിസ്മയ ലോകം തുറന്ന് മാജിക് കലാകാരന്മാര്‍ കണ്ണൂര്‍ ജൂബിലി ഹാളില്‍ മാന്ത്രിക വിസ്മയം തീര്‍ത്തു. മാന്ത്രിക മുത്തച്ഛന്‍ വാഴക്കുന്നം നമ്പൂതിരിയുടെ അനുസ്മരണ ദിനത്തിന്റെ ഭാഗമായി ജില്ലാ പഞ്ചായത്തും നീലേശ്വരം ആസ്ഥാനമായി പ്രവര്‍ത്തിക്കുന്ന ഇന്‍സ്റ്റിറ്റ്യൂട്ട് ഓഫ് മാജിക്കും സംയുക്തമായാണ് വാഴക്കുന്നം മെമ്മോറിയല്‍ മായാജാല മത്സരവും ഗാലാഷോയും സംഘടിപ്പിച്ചത്. വിവിധ ജില്ലകളില്‍ നിന്നെത്തിയ 250ഓളം കലാകാരന്മാര്‍ ചടങ്ങിനെത്തി. സീനിയര്‍, ജൂനിയര്‍ വിഭാഗത്തിലായിരുന്നു മത്സരം. ടി.വി രാജേഷ് എം.എല്‍.എ ഉദ്ഘാടനം ചെയ്തു. മാന്ത്രികന്‍ പ്രൊഫ. ഗോപിനാഥ് മുതുകാട് വിശിഷ്ടാതിഥിയായി. എസ് ഇസ്മാഈല്‍ ഷാ അധ്യക്ഷനായി. തുളസീദാസ് രാജ, സുധീര്‍ മാടക്കത്ത്, പ്രൊഫ. ശങ്കര്‍ ഉടുപ്പി, പ്രൊഫ. പി.എം മിത്ര, പ്രൊഫ. ശങ്കര്‍, എം കൃഷ്ണന്‍ സംസാരിച്ചു. വൈകുന്നേരം സമാപന സമ്മേളനം ജില്ലാ പഞ്ചായത്ത് പ്രസിഡന്റ് കെ.വി സുമേഷ് ഉദ്ഘാടനം ചെയ്തു. തുടര്‍ന്ന് പ്രമുഖ മാജിക് കലാകാരന്മാരായ ജൂനിയര്‍ ശങ്കര്‍ കര്‍ണാടക, പ്രഹ്ലാദ ആചാര്യ കര്‍ണാടക, എം.പി ഹാഷിം, പി.പി നാണു, നിയാസ് എന്നിവരുടെ മാജിക് അവതരണവുമുണ്ടായി.