പത്തിരിപ്പാല: മഹാകവി കുഞ്ചന്‍ നമ്പ്യാര്‍ സ്മാരക നവീകരണത്തിനു തുടക്കമായി. നടപ്പുവര്‍ഷത്തെ ബജറ്റില്‍ അനുവദിച്ച രണ്ടു കോടി രൂപയാണ് ഇതിനായി വിനിയോഗിക്കുന്നത്. സ്മാരക മന്ദിരത്തിന്റെ ബലപ്പെടുത്തല്‍, തുള്ളല്‍ പഠന ഗവേഷണകേന്ദ്രം, ലൈബ്രറി, മ്യൂസിയം, മിനി തിയേറ്റര്‍ എന്നിവ ഉള്‍പ്പെടെയുള്ള പ്രോജക്ട് റിപ്പോര്‍ട്ട് സാംസ്‌കാരിക വകുപ്പിന്റെ പരിഗണനയ്ക്ക് സമര്‍പിച്ചു.
കലാപീഠം ക്ലാസ് മുറികള്‍ നിര്‍മിക്കുന്നതിനായി മുന്‍ഭരണസമിതിയുടെ കാലത്ത് തുടങ്ങിയ പ്രവൃത്തികള്‍ പാതിവഴിക്ക് ഉപേക്ഷിക്കപ്പെട്ട നിലയിലായിരുന്നു. പുതിയ ഭരണസമിതിയുടെ ശ്രമഫലമായി ഈയിനത്തില്‍ പത്തുലക്ഷം രൂപ സംസ്ഥാന സര്‍ക്കാര്‍ അനുവദിച്ചിട്ടുണ്ട്. ഇതുപ്രകാരമുള്ള നിര്‍മാണപ്രവര്‍ത്തനങ്ങള്‍ ഉടന്‍ തുടങ്ങും.
അധ്യാപകര്‍ ഉള്‍പ്പെടെയുള്ള ജീവനക്കാരുടെ ശമ്പളം പുതിയ ഭരണസമിതി അധികാരം ഏല്‍ക്കുമ്പോള്‍ നാലു മാസത്തെ കുടിശികയുണ്ടായിരുന്നു. കുടിശിക തീര്‍ക്കുന്നതിനു പ്രത്യേക ഗ്രാന്റ് അനുവദിക്കുന്നതിനു വേണ്ടിയുള്ള അപേക്ഷ സമര്‍പിച്ചിരുന്നു. സാംസ്‌കാരിക വകുപ്പിന്റെ അംഗീകാരത്തോടെ ധനകാര്യവകുപ്പിന്റെ പരിഗണനയിലാണ് ഈ തുക അനുവദിക്കുന്നതെന്ന് സാംസ്‌കാരിക മന്ത്രി ഉറപ്പു നല്‍കി.
വാര്‍ഷിക ഗ്രാന്റായി ലഭിക്കുന്ന നാലുലക്ഷം രൂപ അപര്യാപ്തമായതിനാല്‍ 25 ലക്ഷം രൂപയായി വര്‍ധിപ്പിക്കണമെന്ന ഭരണസമിതിയുടെ ആവശ്യത്തിന് അനുകൂലമായ നിലപാടാണ് സാംസ്‌കാരിക വകുപ്പിന്റെ ഭാഗത്തുനിന്നുള്ളത്. സ്ഥാപനത്തെ ജില്ലയിലെ കലാസാംസ്‌കാരിക പ്രവര്‍ത്തനങ്ങളുടെ കേന്ദ്രമാക്കാനുള്ള ശ്രമവും ഭരണസമിതി തുടങ്ങി.
കേരള കലാമണ്ഡലം, സംഗീത നാടക അക്കാദമി, സാഹിത്യഅക്കാദമി, ഫോക്‌ലോര്‍ അക്കാദമി തുടങ്ങി ഇതര സാംസ്‌കാരിക സ്ഥാപനങ്ങളുടെ സഹകരണത്തോടെ വിവിധ പരിപാടികള്‍ ആസൂത്രണം ചെയ്തുവരികയാണ്. ഡിസംബര്‍ അവസാനവാരം മൂന്നു ദിവസങ്ങളിലായി നടന്ന തുള്ളല്‍ മഹോത്സവം ഇതിലേക്കുള്ള ആദ്യ ചുവടുവയ്പായിരുന്നു. സാംസ്‌കാരിക പ്രവര്‍ത്തകരുടെയും നാട്ടുകാരുടെയും പിന്തുണ ഇത്തരം പ്രവര്‍ത്തനങ്ങള്‍ക്ക് നന്നായി ലഭിക്കുന്നുണ്ടെന്ന് സ്മാരകം ഭരണസമിതി അറിയിച്ചു.