തിരുവനന്തപുരം: യൂനിവേഴ്‌സിറ്റി കോളജില്‍ പെണ്‍ സുഹൃത്തുക്കളുമായെത്തിയ യുവാവിനേയും പെണ്‍കുട്ടികളേയും കോളജിലെ എസ്.എഫ്‌ഐ പ്രവര്‍ത്തകര്‍ മര്‍ദിച്ചതായി പരാതി. പരുക്കേറ്റ തൃശൂര്‍ സ്വദേശിയും കലാപ്രവര്‍ത്തകനുമായ ജിജേഷിനെ ജനറല്‍ ആശുപത്രിയില്‍ പ്രവേശിപ്പിച്ചു. കോളജിലെ രണ്ടും മൂന്നും വര്‍ഷം ബിരുദ വിദ്യാര്‍ഥിനികളായ അസ്മിതക്കും സൂര്യഗായത്രിക്കും ഒപ്പമാണു ജിജേഷ് യൂനിവേഴ്‌സിറ്റിയിലെത്തിയത്.
കോളജില്‍ പ്രദര്‍ശിപ്പിക്കുന്ന നാടകം കാണാനാണു മൂവരും എത്തിയത്. പെണ്‍കുട്ടികളുടെ അടുത്തിരുന്നതിനെ ചോദ്യംചെയ്ത എസ്.എഫ്.ഐ പ്രവര്‍ത്തകര്‍ മര്‍ദിക്കുകയായിരുന്നുവെന്ന് ജിജീഷ് പറഞ്ഞു. ചോദ്യം ചെയ്ത തങ്ങളേയും മര്‍ദിക്കാന്‍ ശ്രമിച്ചെന്നു വിദ്യാര്‍ഥിനികള്‍ പറഞ്ഞു. വിവരമറിഞ്ഞ് പൊലീസ് എത്തിയെങ്കിലും അക്രമികളെ പിടികൂടാന്‍ തയാറായില്ലെന്നും ആരോപണമുണ്ട്. പെണ്‍കുട്ടികളെ ശല്യം ചെയ്തയാളെ പൊലിസില്‍ പിടിച്ചേല്‍പ്പിച്ചെന്നാണ് എസ്.എഫ്.ഐ പ്രവര്‍ത്തകര്‍ നല്‍കുന്ന വിശദീകരണം.