ഫറോക്ക്: വീടിന് മുകളില്‍ തെങ്ങ് വീണ് ദമ്പതികള്‍ക്ക് പരുക്ക്. കൊളത്തറ റഹിമാന്‍ ബസാര്‍ വ്യവസായ എസ്റ്റേറ്റിന് സമീപം നെടുങ്കടമ്പ് പറമ്പ് പീടിയക്കണ്ടി റഷീദിന്റെ വീടാണ് തെങ്ങ് വീണു തകര്‍ന്നത്. പരുക്കേറ്റ റഷീദിന്റെ മകള്‍ അമിയാസ് ഖാന്‍ (28), ഭാര്യ സജീന (20) എന്നിവരെ സാരമായ പരുക്കുകളോടെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ രാവിലെ 9.30 ഓടെയാണ് സംഭവം. മഴപെയ്തുകൊണ്ടിരിക്കെ സമീപത്തെ വീട്ടുവളപ്പിലെ വലിയ തെങ്ങ് ഓടുമേഞ്ഞ വീട്ടിനുമുകളിലേക്ക് ഒടിഞ്ഞ് വീഴുകയായിരുന്നു. മേല്‍ക്കൂര തകര്‍ന്ന് അവശിഷ്ടങ്ങള്‍ രണ്ട് കിടപ്പുമുറികളിലേക്കും വീണു. ഇതേതുടര്‍ന്നാണ് മുറിക്കകത്തുണ്ടായിരുന്ന ദമ്പതികള്‍ക്ക് പരുക്കേറ്റത്. ഇരുവര്‍ക്കും തലക്കും കൈക്കും നട്ടെല്ലിനും പരുക്കേറ്റിട്ടുണ്ട്. ഗൃഹനാഥന്‍ റഷീദിന്റെ ഭാര്യ അബിന്‍ബാനു അടുക്കളയിലായതിനാല്‍ രക്ഷപ്പെടുകയായിരുന്നു.