പനാമസിറ്റി: പനാമ പേപ്പര്‍ ലീക്കുമായി ബന്ധപ്പെട്ട് നിയമകാര്യ സ്ഥാപനമായ മൊസാക് ഫൊന്‍സെകയുടെ രണ്ട് പ്രധാന പങ്കാളികള്‍ അറസ്റ്റില്‍. വെള്ളിയാഴ്ചയാണ് ഇവര്‍ അറസ്റ്റിലായത്.
റാമോണ്‍ ഫൊന്‍സെകാ മോറ, ജര്‍ഗണ്‍ മൊസാക് എന്നിവരാണ് അറസ്റ്റിലായത്. ബ്രസീലിലെ ലാവാ ജാടോ അഴിമതിക്കേസിലാണ് ഇവരുടെ അറസ്റ്റെന്ന് ഈഫ് ന്യൂസ് റിപ്പോര്‍ട്ട് ചെയ്തു.
പനാമ പ്രസിഡന്റ് ജുവാന്‍ കാര്‍ലോസ് വറേലയുടെ മുന്‍ സഹായിയാണ് ഫൊന്‍സെകാ. ഇവരെ പബ്ലിക് പ്രോസിക്യൂട്ടേഴ്‌സ് ഓഫിസ് ആസ്ഥാനത്തേക്ക് മാറ്റിയെന്ന് പ്രതിരോധ അഭിഭാഷകന്‍ ഇല്യാസ് സൊലാനോ പറഞ്ഞു. 11.5 ദശലക്ഷം രേഖകളാണ് പനാമാ പേപ്പേഴ്‌സ് ചോര്‍ത്തിയത്.
ലോകത്തെ പ്രമുഖ നേതാക്കളുടെ അഴിമതി സംബന്ധിച്ച വിവരമാണ് പുറത്തുവന്നത്. ഇന്റര്‍നാഷനല്‍ കണ്‍സോര്‍ഷ്യം ഓഫ് ഇന്‍വെസ്റ്റിഗേറ്റീവ് ജേണലിസ്റ്റ്‌സ് ആണ് രേഖകള്‍ പുറത്തുവിട്ടത്.