കുട്ടനാട്: ഉത്സവം കണ്ടു മടങ്ങുന്നതിനിടെ ഫൈബര്‍ വള്ളം മറിഞ്ഞ് തമിഴ്‌നാട് സ്വദേശിയെ കാണാതായി. സേലം സ്വദേശി സുരേഷ് കണ്ണനെയാണ് (21) കാണാതായത്. ഇന്നലെ പുലര്‍ച്ചെ രണ്ടോടെ ചമ്പക്കുളം വൈശ്യംഭാഗത്തെ നിര്‍മാണത്തിലിരിക്കുന്ന പാലത്തിനു സമീപം പൂക്കൈതയാറ്റിലായിരുന്നു സംഭവം. പ്രദേശത്തെ സ്വകാര്യ റിസോര്‍ട്ടിലെ ജീവനക്കാരനാണ് സുരേഷ്.
കഴിഞ്ഞദിവസം രാത്രി മലയാളികളായ രണ്ടു സഹപ്രവര്‍ത്തകര്‍ക്കൊപ്പമാണ് ഇയാള്‍ മറുകരയിലുള്ള ക്ഷേത്രത്തില്‍ ഉത്സവത്തിനു പോയത്. പരിപാടികള്‍ക്കു ശേഷം പുലര്‍ച്ചെ ഫൈബര്‍ വള്ളത്തില്‍ മടങ്ങുന്നതിനിടെ ആറിനു നടുക്കെത്തിയപ്പോള്‍ വള്ളം മറിയുകയായിരുന്നു. ഒപ്പമുണ്ടായിരുന്ന രണ്ടുപേരും നീന്തി രക്ഷപ്പെട്ടു. സുരേഷിനായി തിരച്ചില്‍ തുടരുകയാണ്.