കോഴിക്കോട്: കാമറാ കണ്ണിലൂടെ കണ്ട നാലു പതിറ്റാണ്ടിന്റെ ഇന്ത്യന്‍ രാഷ്ട്രീയ ചരിത്രം പറയുകയാണ് പ്രശസ്ത ഫോട്ടോഗ്രാഫര്‍ പി മുസ്തഫയുടെ പ്രദര്‍ശനം. ലളിതകലാ അക്കാദമി ആര്‍ട് ഗാലറിയില്‍ ആരംഭിച്ച 'ഇന്ത്യന്‍ രാഷ്ട്രീയം നാലു പതിറ്റാണ്ടുകള്‍' എന്ന പ്രദര്‍ശനമാണ് ദേശീയ നേതാക്കളുടെയും കോളിളക്കമുണ്ടാക്കിയ രാഷ്ട്രീയ സംഭവ വികാസങ്ങളുടെയും അപൂര്‍വ ചിത്രങ്ങളിലൂടെ ശ്രദ്ധേയമാകുന്നത്.
ഇന്ദിരാഗാന്ധി മുതല്‍ നരേന്ദ്രമോദി വരെയുള്ള പ്രധാനമന്ത്രിമാരുടെയും രാഷ്ട്രപതിമാരുടെയും രാഷ്ട്രീയ, സ്വകാര്യ ജീവിതത്തിലെ അപൂര്‍വ മുഹൂര്‍ത്തങ്ങളില്‍ നിന്ന് ഒപ്പിയെടുത്ത ചിത്രങ്ങളും പ്രദര്‍ശനത്തിലുണ്ട്. അയോധ്യയിലെ ബാബരി മസ്ജിദ് കര്‍സേവകര്‍ തകര്‍ത്തുന്ന ചിത്രവും രാജീവ്ഗാന്ധിയുടെ മൃതദേഹത്തിനുമുന്‍പില്‍ വിതുമ്പുന്ന സോണിയഗാന്ധിയും ഫലസ്തീന്‍ വിമോചന നേതാവ് യാസര്‍ അറാഫത്തിന് രാഷ്ട്രപതിഭവനില്‍ നല്‍കിയ സ്വീകരത്തിന്റെ ചിത്രവും പോയകാല ഇന്ത്യയുടെ ചരിത്രം വിവരിക്കുന്നു. അന്തരിച്ച സി.എച്ച് മുഹമ്മദ് കോയയുടെ മയ്യത്ത് അവസാനമായി ഒരു നോക്കുകാണാന്‍ കനത്ത മഴയില്‍ കുടചൂടിയെത്തിയ പതിനായിരങ്ങളുടെ ചിത്രവും ആകര്‍ഷകമാണ്.
ഇരുപത് വര്‍ഷം മുന്‍പെടുത്ത താടിയില്ലാത്ത നരേന്ദ്രമോദിയുടെ അപൂര്‍വ ചിത്രം, ഡല്‍ഹി എ.കെ.ജി ഭവനില്‍ ഫോട്ടോഗ്രാഫര്‍മാരുടെ തിരക്കിനിടെ പത്രം വായിക്കുന്ന ഇ.കെ നായനാര്‍, ഇ.എം.എസ് നമ്പൂതിരിപ്പാടിന്റെ ചിരി, കാറപകടത്തെ തുടര്‍ന്ന് ചികിത്സ കഴിഞ്ഞ് തിരിച്ചെത്തിയ കെ കരുണാകരന് നല്‍കിയ സ്വീകരണ ചടങ്ങ് തുടങ്ങി വ്യത്യസ്തമായ ചിത്രങ്ങള്‍ ചരിത്രത്തെ ഓര്‍മപ്പെടുത്തുന്നു. സാമൂഹ്യസാഹചര്യങ്ങളെ പരിഗണിച്ച് പത്രങ്ങളില്‍ അച്ചടിക്കാത്ത ചിത്രങ്ങളാണ് പ്രദര്‍ശനത്തില്‍ ശ്രദ്ധയാകര്‍ഷിക്കുന്നത്. മുന്‍ ഗവര്‍ണര്‍ കെ ശങ്കരനാരായണന്‍ പ്രദര്‍ശനം ഉദ്ഘാടനം ചെയ്തു. നല്ല വാര്‍ത്താചിത്രത്തിന് ആയിരം മുഖപ്രസംഗങ്ങളേക്കാള്‍ ശക്തിയുണ്ടെന്ന് അദ്ദേഹം പറഞ്ഞു. പത്രമുതലാളിമാര്‍ക്ക് താല്‍പര്യമുള്ള പടങ്ങള്‍ മാത്രം പ്രസിദ്ധീകരിക്കുന്ന രീതിക്ക് മാറ്റം വരണം.
എത്ര ന്യൂജനറേഷന്‍ ആയാലും പടമെടുക്കുന്നതില്‍ സാമൂഹ്യബോധം വേണമെന്നും അദ്ദേഹം കൂട്ടിച്ചേര്‍ത്തു. പ്രസ്‌ക്ലബ് പ്രസിഡന്റ് കമാല്‍ വരദൂര്‍ അധ്യക്ഷനായി. എം.വി അസോസിയേറ്റ്‌സ് എം.ഡി എം.വി കുഞ്ഞാമു, മുതിര്‍ന്ന മാധ്യമപ്രവര്‍ത്തകന്‍ പി ദാമോദരന്‍, പി മുസ്തഫ സംസാരിച്ചു. പ്രസ്‌ക്ലബ് സെക്രട്ടറി എന്‍ രാജേഷ് സ്വാഗതവും വൈസ് പ്രസിഡന്റ് ഇ.പി മുഹമ്മദ് നന്ദിയും പറഞ്ഞു. ജൂണ്‍ മൂന്നുവരെയാണ് പ്രദര്‍ശനം.