ന്യൂഡല്‍ഹി: ചാള്‍സ് ഡാര്‍വിന്റെ പരിണാമ സിദ്ധാന്തം ശുദ്ധഅസംബന്ധമാണെന്ന വാദത്തില്‍ താന്‍ ഉറച്ചുനില്‍ക്കുന്നതായി കേന്ദ്ര മാനവവിഭവശേഷി സഹമന്ത്രി സത്യപാല്‍ സിങ്. സഹമന്ത്രിയുടെ വാദത്തിനെതിരേ ശാസ്ത്രമേഖലയില്‍ നിന്നും കടുത്ത വിമര്‍ശനം ഉയരുന്നതിനിടയിലാണ് താന്‍ പ്രസ്താവനയില്‍ ഉറച്ചുനില്‍ക്കുന്നു എന്ന വാക്കുകള്‍ വീണ്ടും.

അടിസ്ഥാനമില്ലാതെ തനിക്കൊരു കാര്യവും പറയാന്‍ കഴിയില്ല. ഞാന്‍ ഒരു ശാസ്ത്ര മേഖലയില്‍ നിന്നാണ് വരുന്നത്. അല്ലാതെ കലാമേഖലയില്‍ നിന്നല്ല. രസതന്ത്രത്തിലാണ് താന്‍ പി.എച്ച്.ഡി ചെയ്തിരിക്കുന്നതെന്നും തന്റെ പ്രസ്താവനയെ ന്യായീകരിച്ചുകൊണ്ട് മന്ത്രി ദേശീയ മാധ്യമത്തോട് പറഞ്ഞു.

കുരങ്ങ് മനുഷ്യനാവുന്നത് ആരും കണ്ടിട്ടില്ല. നമ്മുടെ പൂര്‍വികരില്‍ ഒരാളും തന്നെ വാമൊഴിയാലോ വരമൊഴിയാലോ കുരങ്ങന്‍ മനുഷ്യനായി മാറുന്നത് കണ്ടെന്ന് പറഞ്ഞിട്ടില്ല. അതിനാല്‍ പരിണാമ സിദ്ധാന്തം അംഗീകരിക്കാനാവില്ലെന്നാണ് സഹമന്ത്രി പറഞ്ഞിരുന്നത്. ഇതിനാല്‍ സ്‌കൂളുകളിലെയും കോളജുകളിലെയും പാഠ്യപദ്ധതിയില്‍ മാറ്റം വരുത്തേണ്ടതുണ്ടെന്നും മന്ത്രി പറഞ്ഞിരുന്നു. ഇതിനെതിരേ മുതിര്‍ന്ന ശാസത്രജ്ഞനായ രാഘവേന്ദ്ര ഗഡാഖര്‍ രംഗത്തെത്തിയിരുന്നു.