ധാക്ക: തിസരാ പെരേരയുടെ ഓള്‍ റൗണ്ട് മികവില്‍ ശ്രീലങ്കയ്ക്ക് വിജയം. സമീപ കാലത്ത് നിരന്തര പരാജയങ്ങളില്‍ നട്ടംതിരിഞ്ഞ ലങ്കന്‍ ടീം ത്രിരാഷ്ട്ര പോരാട്ടത്തില്‍ സിംബാബ്‌വെയെ അഞ്ച് വിക്കറ്റിന് വീഴ്ത്തിയാണ് വിജയ വഴിയില്‍ തിരിച്ചെത്തിയത്.
ഇന്നത്തെ മത്സരം കൂടി തോറ്റിരുന്നെങ്കില്‍ അവരുടെ പരമ്പരയിലെ നിലനില്‍പ്പ് തന്നെ അപകടത്തിലാകുമായിരുന്നു. ആദ്യം ബാറ്റ് ചെയ്ത സിംബാബ്‌വെയെ 44 ഓവറില്‍ 198 റണ്‍സില്‍ പുറത്താക്കിയ ലങ്ക 44.5 ഓവറില്‍ അഞ്ച് വിക്കറ്റ് നഷ്ടപ്പെടുത്തി 202 റണ്‍സെടുത്താണ് വിജയിച്ചത്.
എട്ടോവറില്‍ 33 റണ്‍സ് വഴങ്ങി നാല് വിക്കറ്റെടുത്ത് സിംബാബ്‌വെ ബാറ്റിങിന്റെ നടുവൊടിച്ച തിസരാ പെരേര ബാറ്റിങിനിറങ്ങി 26 പന്തില്‍ മൂന്ന് സിക്‌സും ഒരു ഫോറും സഹിതം പുറത്താകാതെ 39 റണ്‍സ് അടിച്ചെടുത്താണ് ടീമിനെ വിജയ തീരത്തെത്തിച്ചത്. പെരേര തന്നെ കളിയിലെ കേമന്‍.
ടോസ് നേടി സിംബാബ്‌വെ ബാറ്റിങ് തിരഞ്ഞെടുക്കുകയായിരുന്നു. ഇടവേളയ്ക്ക് ശേഷം ടീമിലേക്ക് തിരിച്ചെത്തിയ ബ്രണ്ടന്‍ ടെയ്‌ലര്‍ 58 റണ്‍സെടുത്ത് ടീമിന്റെ ടോപ് സ്‌കോററായി. വാലറ്റത്ത് ക്യാപ്റ്റന്‍ ക്രെമര്‍ 34 റണ്‍സെടുത്തു. നാല് വിക്കറ്റുകള്‍ വീഴ്ത്തി പെരേര തിളങ്ങിയപ്പോള്‍ മൂന്ന് വിക്കറ്റുമായി ഫെര്‍ണാണ്ടോയും രണ്ട് വിക്കറ്റുകള്‍ വീഴ്ത്തി സന്റാകനും മികച്ച പിന്തുണ നല്‍കി.
വിജയം തേടിയിറങ്ങിയ ലങ്ക ഒരു ഘട്ടത്തില്‍ 145 റണ്‍സെടുക്കുന്നതിനിടെ അഞ്ച് വിക്കറ്റുകള്‍ നഷ്ടപ്പെട്ട് പരുങ്ങിയിരുന്നു. എന്നാല്‍ ക്യാപ്റ്റന്‍ ദിനേഷ് ചാന്‍ഡിമലിന്റെ (പുറത്താകാതെ 71 പന്തില്‍ 38) ക്ഷമയോടെയുള്ള ചെറുത്ത് നില്‍പ്പും ഒപ്പം തിസരാ പെരേരയുടെ കൂറ്റനടികളുമാണ് അവരെ വിജയിപ്പിച്ചത്. മുന്‍നിരയില്‍ ഓപണര്‍ കുശാല്‍ പെരേര (49), കുശാല്‍ മെന്‍ഡിസ് (36) എന്നിവരും തിളങ്ങി.