റിയാദ്: ആഭ്യന്തര യുദ്ധം മൂലം ദുരിതത്തിലായ യമനില്‍ നാല് വര്‍ഷത്തിന് ശേഷം വീണ്ടും ബജറ്റ് അവതരിപ്പിച്ചു .

2014 ലാണ് ഇവിടെ ഏറ്റവും ഒടുവില്‍ ബജറ്റ് അവതരിപ്പിക്കപ്പെട്ടത്. ആഭ്യന്തര സംഘര്‍ഷം രൂക്ഷമായതിനെ തുടര്‍ന്ന് സഊദി അറേബ്യയുടെ നേതൃത്വത്തിലുള്ള സഖ്യ സൈന്യം 2015 ല്‍ യുദ്ധം ആരംഭിക്കുകയും ഇപ്പോഴും യുദ്ധം തുടരുകയും ചെയ്യുന്നതിടക്കാണ് ഈ വര്‍ഷം ബജറ്റ് അവതരിപ്പിച്ചതായി ഔദ്യോഗിക ഗവണ്‍മെന്റ്് കഴിഞ്ഞ ദിവസം പ്രഖ്യാപിച്ചത്.

കനത്ത യുദ്ധത്തിനു ശേഷം രാജ്യത്തിന്റെ ഏകദേശ ഭാഗങ്ങള്‍ തങ്ങളുടെ നിയന്ത്രണതിലാകുകയും സെന്‍ട്രല്‍ ബാങ്കിന്റെ പൂര്‍ണ നിയന്ത്രണം ഔദ്യോഗിക സര്‍ക്കാരിന് വന്നെത്തുകയും ചെയ്തതോടെയാണ് ബജറ്റ് സമ്പ്രദായവുമായി സര്‍ക്കാര്‍ മുന്നിട്ടിറങ്ങിയത്.

ഏകദേശം 978 ബില്ല്യന്‍ റിയാല്‍ (2.22 ബില്ല്യന്‍ ഡോളര്‍) വരുമാനവും 1.46 ട്രില്ല്യന്‍ റിയാല്‍ (3.32 ബില്ല്യന്‍ ഡോളര്‍) ചെലവും പ്രതീക്ഷിക്കുന്ന ബജറ്റാണ് അവതരിപ്പിച്ചതെന്ന് യമന്‍ പ്രധാനമന്ത്രി അഹമദ് ബിന്‍ ദാഗിര്‍ മാധ്യമ പ്രവര്‍ത്തകരോട് പറഞ്ഞു.