ജിദ്ദ: സഊദിയില്‍ ഈ മാസം 28 മുതല്‍ വൈദ്യുതി ചാര്‍ജ് അടയ്ക്കാന്‍ ഇ-ബില്ലുകള്‍ നല്‍കും. സേവന ബില്ലുകള്‍ ഏകീകരിക്കണമെന്ന നിയമത്തിന്റെ ഭാഗമായാണ് പുതിയ നടപടി. പുതിയ നിയമം പ്രാബല്യത്തിലാവുന്നതോടെ വിവിധ സേവനങ്ങള്‍ക്കുള്ള ബില്‍ അടയ്ക്കല്‍ ഉപഭോക്താക്കള്‍ക്ക് എളുപ്പമാകും.

സഊദിയില്‍ ശമ്പളം ലഭിക്കുന്ന അതേ ദിവസം തന്നെയായിരിക്കും സേവനങ്ങളുടെ ബില്ലും ലഭിക്കുക. ഡിജിറ്റല്‍ സംവിധനത്തിലുള്ള ഇ-ബില്ലുകളായിരിക്കും ഉപഭോക്താക്കള്‍ക്കു ലഭിക്കുക. സ്മാര്‍ട് ഫോണ്‍ ആപ്ലിക്കേഷനായ അല്‍ കഹ് റബ വഴി ഉപഭോക്താക്കള്‍ക്ക് ബില്ല് സംബന്ധിച്ച വിവരങ്ങളറിയാം.

ഇ-ബില്‍ സംവിധാനം നിലവില്‍ വരുന്നതോടെ ഉപഭോക്താക്കള്‍ക്ക് ഏതു സമയത്തു വേണമെങ്കിലും ബില്‍ സംബന്ധമായ കാര്യങ്ങള്‍ അറിയാം. ഇതിനായി പ്രത്യേക എസ്എംഎസ് സന്ദേശങ്ങളും വെബ്‌സൈറ്റുകളും ആപ്ലിക്കേഷനുകളും സജ്ജമാക്കിയിട്ടുണ്ട്. ഇതിനുപുറമെ ഇ-മെയിലിലൂടെയും ബില്ല് സംബന്ധമായ വിവരങ്ങള്‍ ഉപഭോക്താക്കള്‍ക്ക് അറിയാന്‍ സാധിക്കും.