മാഡ്രിഡ്: സ്പാനിഷ് ലാ ലിഗ പോരാട്ടത്തില്‍ ബാഴ്‌സലോണ തകര്‍പ്പന്‍ വിജയം സ്വന്തമാക്കി അപരാജിതരായി നിലകൊള്ളുന്നു. എവേ പോരാട്ടത്തില്‍ കറ്റാലന്‍ സംഘം റയല്‍ ബെറ്റിസിനെ തുരത്തി.
സൂപ്പര്‍ താരങ്ങളായ ലയണല്‍ മെസ്സി, ലൂയീസ് സുവാരസ് എന്നിവര്‍ ഇരട്ട ഗോളുകളുമായി തിളങ്ങിയപ്പോള്‍ റാക്കിറ്റിച് ശേഷിച്ച ഗോള്‍ സ്വന്തമാക്കി. ജയത്തോടെ 20 കളികളില്‍ നിന്ന് 54 പോയിന്റുകള്‍ സ്വന്തമാക്കി ബാഴ്‌സ ഒന്നാം സ്ഥാനത്ത് നില്‍ക്കുന്നു. രണ്ടാമതുള്ള അത്‌ലറ്റിക്കോ മാഡ്രിഡിന് ഇത്രയും കളികളില്‍ നിന്ന് 43 പോയിന്റ്.
റയല്‍ ബെറ്റിസിനെതിരായ പോരാട്ടത്തിന്റെ ആദ്യ പകുതി ഗോള്‍രഹിതമായപ്പോള്‍ അഞ്ച് ഗോളുകളും പിറന്നത് രണ്ടാം പകുതിയില്‍. 59ാം മിനുട്ടില്‍ റാക്കിറ്റിചാണ് ഗോള്‍ വേട്ടയ്ക്ക് തുടക്കമിട്ടത്. 64, 69 മിനുട്ടുകളില്‍ മെസ്സിയും 80, 89 മിനുട്ടുകളില്‍ സുവാരസും പട്ടിക തികച്ചു.