ബംഗളൂരു: കേരളം സന്തോഷ് ട്രോഫി പോരാട്ടത്തിന്റെ ഫൈനല്‍ റൗണ്ടിലേക്ക് മുന്നേറി. ദക്ഷിണ മേഖലാ യോഗ്യതാ പോരാട്ടത്തിന്റെ ഗ്രൂപ്പ് ബിയിലെ അവസാന മത്സരത്തില്‍ തമിഴ്‌നാടുമായി ഗോള്‍രഹിത സമനിലയില്‍ പിരിഞ്ഞതോടെയാണ് കേരളത്തിന്റെ ഫൈനല്‍ റൗണ്ട് പ്രവേശം.
കേരളത്തിനൊപ്പം ഒരു ജയവും ഒരു സമനിലയുമായി തമിഴ്‌നാടും പോയിന്റ് പങ്കിട്ടെങ്കിലും മികച്ച ഗോള്‍ ശരാശരിയുടെ പിന്‍ബലത്തിലാണ് കേരളത്തിന്റെ മുന്നേറ്റം. നേരത്തെ ആദ്യ മത്സരത്തില്‍ ആന്ധ്രാപ്രദേശിനെ മറുപടിയില്ലാത്ത ഏഴ് ഗോളുകള്‍ക്ക് തകര്‍ത്തത് കേരളത്തിന്റെ ഫൈനല്‍ റൗണ്ട് പ്രവേശത്തില്‍ നിര്‍ണായകമായി.
കഴിഞ്ഞ ദിവസം സര്‍വിസസിനെ അട്ടിമറിച്ച് കര്‍ണാടകയും ഫൈനല്‍ റൗണ്ടിലേക്ക് കടന്നിരുന്നു. ദക്ഷിണ മേഖലയില്‍ നിന്ന് കേരളവും കര്‍ണാടകയുമാണ് ഫൈനല്‍ റൗണ്ട് പോരാട്ടങ്ങളിലേക്ക് അര്‍ഹത നേടിയത്.