കൊച്ചി: കൊച്ചി മെട്രോയുടെ വാതില്‍ തുറക്കാന്‍ സാധിക്കാത്തതിനെ തുടര്‍ന്ന് യാത്രക്കാര്‍ ട്രെയിനിനുള്ളില്‍ കുടുങ്ങി.
ഇന്നലെ രാവിലെ 11.30ന് കളമശ്ശേരിക്ക് സമീപമുള്ള യൂനിവേഴ്‌സിറ്റി സ്റ്റോപ്പിലാണ് സംഭവം. മഹാരാജാസില്‍ നിന്ന് ആലുവയിലേക്ക് പോവുകയായിരുന്ന മെട്രോ ട്രെയിന്‍ യൂനിവേഴ്‌സിറ്റി സ്‌റ്റേഷനില്‍ നിര്‍ത്തിയപ്പോഴാണ് വാതില്‍ തകരാറിലായത്. ഇതേത്തുടര്‍ന്ന് പുറത്തിറങ്ങാന്‍ സാധിക്കാതെ വന്നതോടെ യാത്രക്കാര്‍ പരിഭ്രാന്തരായി. കുറച്ച് സമയത്തിനു ശേഷം വാതിലിന്റെ തകരാര്‍ കാരണമാണ് തുറക്കാന്‍ സാധിക്കാത്തതെന്നും യാത്രക്കാര്‍ക്ക് അടുത്ത സ്റ്റേഷനില്‍ ഇറങ്ങി മറ്റൊരു ട്രെയിനില്‍ കയറി ഇവിടെ ഇറക്കാനുള്ള സൗകര്യമൊരുക്കുമെന്ന് അറിയിപ്പ് വന്നു.
തുടര്‍ന്ന് യൂനിവേഴ്‌സിറ്റിയില്‍ ഇറങ്ങാനുള്ള യാത്രക്കാരെ കളമശ്ശേരി സ്റ്റേഷനില്‍ ഇറക്കി ആലുവയില്‍ നിന്ന് വന്ന മറ്റൊരു ട്രെയിനില്‍ തിരികെ യൂനിവേഴ്‌സിറ്റി സ്റ്റേഷനില്‍ എത്തിച്ചു.