പാലക്കാട്: പാലക്കാട് നഗരവികസനത്തിന്റെ ഭാഗമായി തയ്യാറാക്കിയ കരട് മാസ്റ്റര്‍ പ്‌ളാനിലെ അപാകതകള്‍ പരിഹരിക്കുമെന്നും ഇക്കാര്യത്തില്‍ ജനങ്ങളുടെ ആശങ്കകള്‍ ദൂരീകരിക്കുമെന്നും കൗണ്‍സിലര്‍മാരുടെ ഉറപ്പ്. നഗരത്തിലെ ഗതാഗതക്കുരുക്കിന് കാരണമാകുന്ന ഒലവക്കോട് കല്‍മണ്ഡപം ദേശീയ പാത മലമ്പുഴ വഴിയാക്കാന്‍ സംഘടിത ഇടപെടല്‍ ആവശ്യമാണെന്ന് യോഗത്തില്‍ അഭിപ്രായമുയര്‍ന്നു.
പാലക്കാട് നഗരവികസന പൗരസമിതി ഇന്നലെ എംപയര്‍ ഹോട്ടലില്‍ നടത്തിയ സംവാദത്തിലാണ് കക്ഷി രാഷ്ട്രീയം മറന്ന് കൗണ്‍സിലര്‍മാര്‍ നിലപാടില്‍ ഒന്നിച്ചത്. സംവാദത്തില്‍ മുനിസിപ്പല്‍ വൈസ് ചെയര്‍മാന്‍ സി. കൃഷ്ണകുമാര്‍ മുഖ്യപ്രഭാഷണം നടത്തി.
പാലക്കാടിന്റെ മനസ് അറിയാത്ത ഉദ്യോഗസ്ഥര്‍ തോന്നിയ പോലെയാണ് മാസ്റ്റര്‍ പ്‌ളാന്‍ തയ്യാറാക്കിയതെന്ന് സി. കൃഷ്ണകുമാര്‍ പറഞ്ഞു.
വികസന പ്രവര്‍ത്തനങ്ങളായി സ്ഥലം വിട്ടു നല്‍കിയവരുടെ ആശങ്കകള്‍ പരിഹരിക്കാന്‍ നഗരസഭ തയ്യാറാണ്. മാസ്റ്റര്‍ പ്ലാന്‍ ഭാവി തലമുറയ്ക്ക് ഗുണകരമാകണം.
ദേശീയ പാത ഒലവക്കോട് കല്‍മണ്ഡപം എന്ന വഴിയില്‍ നിന്ന് മാറ്റിയില്ലെങ്കില്‍ ഭാവിയില്‍ പാലക്കാട് ഗതാഗതക്കുരുക്കിലാകുമെന്നും കൃഷ്ണകുമാര്‍ പറഞ്ഞു.
നഗരവികസന പൗരസമിതി പ്രസിഡന്റ് അഡ്വ.കെ. രഘു അദ്ധ്യക്ഷനായി. എന്‍.അയ്യപ്പന്‍ സ്വാഗതം പറഞ്ഞു. പരിപാടിയില്‍ നേരിട്ട് പങ്കെടുക്കാന്‍ കഴിയാതിരുന്ന ഷാഫി പറമ്പില്‍ എം.എല്‍.എ ഫോണ്‍ വഴി സംവാദത്തില്‍ പങ്കെടുത്തു. കരട് മാസ്റ്റര്‍ പ്ലാനിലെ അപാകതകള്‍ പരിഹരിക്കാന്‍ നിയമസഭയിലും പുറത്തും സാധ്യമായതെല്ലാം ചെയ്യുമെന്ന് എം.എല്‍.എ ഉറപ്പു നല്‍കി.
ജനങ്ങളുടെ ആശങ്കകള്‍ പരിഹരിക്കുന്നതിന് രാഷ്ട്രീയം മറന്ന് ഒന്നിക്കുമെന്നും എം.എല്‍.എ പറഞ്ഞു.
കരട് മാസ്റ്റര്‍ പ്‌ളാന്‍ തയ്യാറാക്കിയത് മുതല്‍ ഉദ്യോഗസ്ഥര്‍ക്ക് ന്യൂനതകള്‍ സംബന്ധിച്ച് സൂചന നല്‍കിയിരുന്നതായി കൗണ്‍സിലര്‍ ഭവദാസ് സംവാദത്തില്‍പറഞ്ഞു. എന്നാല്‍ ഉദ്യോഗസ്ഥര്‍ തോന്നിയപോലെയാണ് കരട് തയ്യാറാക്കിയത്. ഇപ്പോള്‍ കിട്ടിയിട്ടുള്ള 600 പരാതികളും സബ്കമ്മിറ്റി നേരിട്ട് പരിശോധിക്കും.
കരട് പരിഷ്‌കരണത്തിന് രാഷ്ട്രീയഭേദമന്യേ സംഘടിതശ്രമം ആവശ്യമാണെന്നും ഭവദാസ് പറഞ്ഞു.
ജലസ്രോതസുകള്‍ സംരക്ഷിച്ചുള്ള വികസനവും മാസ്റ്റര്‍പ്‌ളാനുമാണ് വേണ്ടതെന്ന് കൗണ്‍സിലര്‍ ഉദയകുമാര്‍ പറഞ്ഞു.
ജനഹിതം മാനിച്ചുള്ള തീരുമാനങ്ങളാണ് ഉണ്ടാകേണ്ടതെന്നും അതിനായി ശ്രമിക്കുമെന്നും ഉദയകുമാര്‍ ഉറപ്പു നല്‍കി.