ന്യൂഡല്‍ഹി: ആം ആദ്മി പാര്‍ട്ടിയുടെ 20 എം.എല്‍.എമാരെ അയോഗ്യരാക്കിയ മുന്‍മുഖ്യതെരഞ്ഞെടുപ്പ് കമ്മിഷണറുടെ നടപടിയെ അനുകൂലിച്ച് മുഖ്യതെരഞ്ഞെടുപ്പ് കമ്മിഷണര്‍ ഓംപ്രകാശ് റാവത്ത്.
ആം ആദ്മിയുടെ ഭാഗം കേള്‍ക്കാന്‍ അവര്‍ക്ക് രണ്ട് അവസരങ്ങള്‍ നല്‍കിയിരുന്നുവെങ്കിലും അവര്‍ അത് വേണ്ടവിധത്തില്‍ പ്രയോജനപ്പെടുത്തിയില്ലെന്ന് റാവത്ത് കുറ്റപ്പെടുത്തി. 2017 ജൂണ്‍ 23ന് കമ്മിഷന്റെ ഉത്തരവില്‍ നിയമ നടപടികള്‍ യഥാസമയം നടക്കുമെന്ന് അറിയിച്ചിരുന്നു. 2017 സെപ്റ്റംബര്‍ 28നും നവംബര്‍ രണ്ടിനും അവര്‍ക്ക് രണ്ട് നോട്ടിസുകള്‍ നല്‍കുകയും ചെയ്തു. എം.എല്‍.എമാരുടെ ഇരട്ടപ്പദവി സംബന്ധിച്ച വാദം കേള്‍ക്കുന്നതിനുവേണ്ടിയായിരുന്നു ഇത്. അവര്‍ അതിന് മറുപടി നല്‍കിയിരുന്നെങ്കില്‍ ഇക്കാര്യത്തില്‍ ഭാഗം കേള്‍ക്കാന്‍ ഒരു തിയതി നിശ്ചയിക്കുമായിരുന്നു.
കമ്മിഷന്റെ ഉത്തരവ് റദ്ദാക്കാനാവശ്യപ്പെട്ട് ഹൈക്കോടതിയില്‍ നല്‍കിയ ഹരജി തള്ളുംവരെ ഉത്തരവുമായി മുന്നോട്ടുപോകരുതെന്നായിരുന്നു തെരഞ്ഞെടുപ്പ് കമ്മിഷന്‍ നല്‍കിയ രണ്ട് നോട്ടിസുകള്‍ക്കും എ.എ.പിയുടെ മറുപടിയെന്നും മുഖ്യതെരഞ്ഞെടുപ്പ് കമ്മിഷണര്‍ പറഞ്ഞു.