സ്വാന്‍സി: തുടര്‍ച്ചയായ 18 മത്സരങ്ങളില്‍ തോല്‍വിയറിയാതെ മുന്നേറിയ ലിവര്‍പൂളിന് കടിഞ്ഞാണിട്ട് സ്വാന്‍സി സിറ്റി. 40ാം മിനുട്ടില്‍ സെന്റര്‍ബാക്ക് ആല്‍ഫി മൗസന്‍ നേടിയ ഗോളിലാണ് സ്വാന്‍സി വിജയിച്ചത്. ഇതോടെ കുഞ്ഞന്‍മാര്‍ക്ക് മുന്‍പില്‍ അടിയറവ് പറയുന്ന ശീലം ലിവര്‍പൂള്‍ വീണ്ടും ആവര്‍ത്തിച്ചു.
മാഞ്ചസ്റ്റര്‍ സിറ്റിക്കെതിരേ നേടിയ 4-3 വിജയത്തിന്റെ ആത്മവിശ്വാസത്തിലിറങ്ങിയ ടീം മത്സരത്തിലുടനീളം മങ്ങിയ പ്രകടനമാണ് കാഴ്ചവച്ചത്. ഒരു പക്ഷേ ലിവര്‍പൂളിന് ഇത് നിര്‍ഭാഗ്യ മത്സരമെന്ന് തന്നെ പറയാം. മികച്ച പല അവസരങ്ങളും ലക്ഷ്യം കാണാതെ പോയതും അവസാന മിനുട്ടില്‍ ഫിര്‍മീനോയുടെ ഹെഡര്‍ പോസ്റ്റില്‍ തട്ടി തെറിച്ചതും ടീമിന് തിരിച്ചടിയായി. 75 മില്യണ്‍ പൗണ്ടിന് ടീമിലെത്തിയ പ്രതിരോധ താരം വാന്‍ഡേയ്ക്കിന്റെ അരങ്ങേറ്റ മത്സരത്തിലാണ് ടീം തോല്‍വി വഴങ്ങിയത്. പട്ടികയില്‍ 20ാം സ്ഥാനത്തുള്ള സ്വാന്‍സിയോടേറ്റ പരാജയം ലിവര്‍പൂളിന് കനത്ത തിരിച്ചടിയാകും. 24 മത്സരങ്ങളില്‍ നിന്ന് 13 ജയവും എട്ടു സമനിലയും മൂന്ന് തോല്‍വിയുമടക്കം 47 പോയിന്റുമായി പട്ടികയില്‍ നാലാം സ്ഥാനത്താണ് ലിവര്‍പൂള്‍. ഒന്നാം സ്ഥാനത്തുള്ള മാഞ്ചസ്റ്റര്‍ സിറ്റിയുമായി നിലവില്‍ 18 പോയിന്റ് വ്യത്യാസമുണ്ട്. 24 മത്സരങ്ങളില്‍ നിന്ന് സിറ്റിക്ക് 65 പോയിന്റാണുള്ളത്. 53 പോയിന്റുമായി മാഞ്ചസ്റ്റര്‍ യുനൈറ്റഡും 50 പോയിന്റുമായി ചെല്‍സിയുമാണ് പട്ടികയില്‍ ലിവര്‍പൂളിന് തൊട്ടു മുന്‍പിലുള്ളത്.

യുവന്റസിന് വിജയം
യുവന്റസ്: ഇറ്റാലിയന്‍ സീരി എ പോരാട്ടത്തില്‍ യുവന്റസിന് ജയം. എതിരില്ലാത്ത ഒരു ഗോളിന് ജെനോവയെയാണ് അവര്‍ പരാജയപ്പെടുത്തിയത്. 16ാം മിനുട്ടില്‍ ഡഗ്ലസ് കോസ്റ്റയാണ് യുവന്റസിന് വേണ്ടി വല ചലിപ്പിച്ചത്. നിരവധി അവസരങ്ങള്‍ ലഭിച്ചെങ്കിലും യുവന്റസിന് മുതലെടുക്കാനായില്ല. ഗോള്‍കീപ്പര്‍ മാറ്റിയ പെറിന്റെ മിന്നും സേവുകളാണ് ഒരു പക്ഷേ ജെനോവയെ വന്‍പരാജയത്തില്‍ നിന്ന് രക്ഷപ്പെടുത്തിയത്.
ഇതോടെ യുവന്റസിന് പോയന്റ് പട്ടികയില്‍ ഒന്നാമതുള്ള നാപോളിയുമായുള്ള പോയന്റ് വ്യത്യാസം ഒന്നാക്കി കുറക്കാന്‍ സാധിച്ചു. 21 മത്സരങ്ങളില്‍ നിന്ന് 54 പോയിന്റുമായി നാപോളിയാണ് പട്ടികയില്‍ മുന്‍പില്‍.
21 കളികളില്‍ നിന്ന് 53 പോയിന്റുമായി യുവന്റസ് തൊട്ടു പിന്നിലുണ്ട്. മൂന്നാം സ്ഥാനത്തുള്ള ലാസിയോ പത്ത് പോയിന്റ് പിന്നിലാണ്.