വാഷിങ്ടണ്‍: അഫ്ഗാനിസ്താന്‍ അതിര്‍ത്തിയില്‍ ഭീകരവാദ പ്രവര്‍ത്തനങ്ങള്‍ നടത്തുന്ന താലിബാന്‍ നേതാക്കളെ അറസ്റ്റ് ചെയ്യണമെന്ന് പാകിസ്താനോട് യു.എസ്. കഴിഞ്ഞ ദിവസം കാബൂളിലെ ഇന്റര്‍കോണ്ടിനെന്റല്‍ ഹോട്ടലിലുണ്ടായ ഭീകരാക്രമണത്തിനു പിറകെയാണ് പ്രതികരണവുമായി അമേരിക്ക രംഗത്തെത്തിയത്.
താലിബാന്‍ ഉത്തരവാദിത്തം ഏറ്റെടുത്ത ആക്രമണത്തില്‍ വിദേശികള്‍ അടക്കം 22 പേര്‍ കൊല്ലപ്പെട്ടിരുന്നു.
വൈറ്റ്ഹൗസ് പ്രസ്താവനയിലൂടെയാണ് ഇക്കാര്യം അറിയിച്ചത്. താലിബാന്‍ നേതാക്കളെ പാകിസ്താന്‍ അടിയന്തരമായി അറസ്റ്റ് ചെയ്യുകയോ രാജ്യത്തുനിന്നു പുറത്താക്കുകയോ ചെയ്യണം. തങ്ങളുടെ അതിര്‍ത്തിയില്‍നിന്ന് ഭീകരവാദ പ്രവര്‍ത്തനങ്ങള്‍ നടത്തുന്നതില്‍നിന്ന് സംഘത്തെ തടയണമെന്നും പ്രസ്താവനയില്‍ പറയുന്നു.