ദാവോസ്: വളര്‍ന്നുവരുന്ന രാജ്യങ്ങളുടെ സഹായം കൂടാതെ തങ്ങള്‍ക്ക് ഏറെ മുന്നോട്ടുപോകാനാകില്ലെന്ന കാര്യം പടിഞ്ഞാറന്‍ രാജ്യങ്ങള്‍ തിരിച്ചറിയണമെന്ന് റിസര്‍വ് ബാങ്ക് ഓഫ് ഇന്ത്യ (ആര്‍.ബി.ഐ) മുന്‍ ഗവര്‍ണര്‍ രഘുറാം രാജന്‍. തങ്ങളുടെ സാമ്പത്തിക ലാഭത്തിന്റെ ഒരു വിഹിതം ഈ രാജ്യങ്ങള്‍ക്കു നല്‍കാന്‍ അവര്‍ തയാറാകണമെന്നും അദ്ദേഹം ആവശ്യപ്പെട്ടു. ദാവോസില്‍ രാജ്യാന്തര സാമ്പത്തിക ഫോറം വാര്‍ഷിക സമ്മേളനത്തില്‍ സംസാരിക്കുകയായിരുന്നു രഘുറാം.
തങ്ങളുടെ ജനസംഖ്യയില്‍ കൂടുതല്‍ പേരും വൃദ്ധരാണെന്നും അവരുടെ ഉല്‍പന്നങ്ങള്‍ക്ക് വികസ്വരരാജ്യങ്ങളിലാണ് കൂടുതല്‍ ആവശ്യക്കാരുള്ളതെന്നും പടിഞ്ഞാറന്‍ രാജ്യങ്ങള്‍ മനസിലാക്കണമെന്നും അദ്ദേഹം പറഞ്ഞു.
'കാര്യങ്ങള്‍ പെട്ടെന്ന് ശരിയായ രീതിയില്‍ പോയില്ലെങ്കില്‍ തകര്‍ന്നുകൊണ്ടിരിക്കുന്ന ലോകത്തിന്റെ ഒരു പ്രശ്‌നവും പരിഹരിക്കാന്‍ ആര്‍ക്കും കഴിയില്ല.
പടിഞ്ഞാറന്‍ രാജ്യങ്ങള്‍ തങ്ങളുടെ ലാഭത്തിന്റെ ഒരു വിഹിതം എന്തുകൊണ്ടാണ് വളര്‍ന്നുകൊണ്ടിരിക്കുന്ന രാജ്യങ്ങളുമായി പങ്കുവയ്ക്കാത്തതെന്ന ചോദ്യത്തിന് അവര്‍ ഉത്തരം നല്‍കേണ്ടതുണ്ട്. '-രഘുറാം രാജന്‍ കൂട്ടിച്ചേര്‍ത്തു.