ദാവോസ്: വേള്‍ഡ് ഇക്കണോമിക് ഫോറത്തില്‍ ക്രിസ്റ്റല്‍ പുസ്‌കാരം ദാവോസില്‍വച്ച് ബോളിവുഡ് താരം ഷാറൂഖ് ഖാന്‍ സ്വീകരിച്ചു. ആസിഡ് ആക്രമണത്തിനിരയായവരെ സഹായിക്കുന്നതിലും മനുഷ്യാവകാശ പ്രശ്‌നങ്ങളിലും ഇടപെട്ടതാണ് ഷാറൂഖിനെ അവാര്‍ഡിന് അര്‍ഹനാക്കിയത്. ഇഗ്ലീഷ് ഗായകന്‍ എല്‍റ്റണ്‍ ജോണ്‍, ആസ്‌ത്രേലിയന്‍ നടി കേറ്റ് ബ്ലാന്‍ഷെറ്റ് എന്നിവര്‍ക്കൊപ്പമാണ് ഷാറൂഖിന് അവാര്‍ഡ് ലഭിച്ചത്.
മാനുഷിക പ്രവര്‍ത്തനങ്ങളില്‍ ഏര്‍പ്പെടുന്ന പ്രതിഭകളെ ആദരിച്ചുകൊണ്ടാണ് ലോക ഇക്കണോമിക് ഫോറം എല്ലാ വര്‍ഷവും ആരംഭിക്കുക. ആസിഡ് അക്രമണത്തിന് ഇരയാകുന്ന സ്ത്രീകളുടെ സന്നദ്ധ സംഘടനയായ മീര്‍ ഫൗണ്ടേഷനുള്ള സഹായം, ആസിഡ് അക്രമണത്തിന് ഇരകളാവുന്നവര്‍ക്കുള്ള ചികിത്സ, പുനരധിവാസം തുടങ്ങിയവക്ക് ഷാറൂഖ് ഖാന്‍ സഹായം നല്‍കുന്നുണ്ട്. നേരത്തെ ഇന്ത്യയില്‍നിന്ന് അമിതാഭ് ബച്ചന്‍, മല്ലിക സാരാഭായ്, എ.ആര്‍ റഹ്മാന്‍, ശബാന ആസ്മി, രവി ശങ്കര്‍, അംജദ് അലി ഖാന്‍ എന്നിവര്‍ക്കും ഈ പുരസ്‌കാരം ലഭിച്ചിട്ടുണ്ട്.