പുല്‍പ്പള്ളി: വരള്‍ച്ച രൂക്ഷമായ പുല്‍പ്പള്ളി, മുള്ളന്‍കൊല്ലി പഞ്ചായത്തുകളില്‍ കുടിവെള്ളമെത്തിക്കാന്‍ ജില്ലാഭരണകൂടം തയാറാകണമെന്ന ആവശ്യം ശക്തമാകുന്നു. അതിര്‍ത്തി മേഖലയിലെ കിണറുകളും കുളങ്ങളും കുഴല്‍ക്കിണറുകളും ഉള്‍പ്പെടെ ജലവിതാനം കുത്തനെ കുറഞ്ഞതോടെ ഈ മേഖലകളില്‍ രൂക്ഷമായ കുടിവെള്ള ക്ഷാമമാണ് അനുഭവപ്പെടുന്നത്. പുല്‍പ്പള്ളി മേഖലയിലെ അമരക്കുനി, കാപ്പിസെറ്റ്, ചീയമ്പം, താന്നിത്തെരുവ്, ആനപ്പാറ, ചുണ്ടക്കൊല്ലി, മുള്ളന്‍കൊല്ലി, പെരിക്കല്ലൂര്‍, പറുദീസക്കവല, ചാമപ്പാറ, വെട്ടിക്കവല, ശശിമല, ഇരിപ്പൂട് തുടങ്ങിയ പ്രദേശങ്ങളിലെല്ലാം കിണറുകളും കുളങ്ങളും വറ്റിയതോടെ വെള്ളം വിലകൊടുത്ത് വാങ്ങേണ്ട അവസ്ഥയാണ്. ഇതിന് പരിഹാരം കാണാന്‍ റവന്യു വകുപ്പിന്റെയും പഞ്ചായത്തിന്റെയും നേതൃത്വത്തില്‍ കുടിവെള്ള ക്ഷാമം രൂക്ഷമായ പ്രദേശങ്ങളില്‍ ജലവിതരണം ആരംഭിക്കുന്നതിനുള്ള നടപടി സ്വീകരിക്കണം. പലയിടങ്ങളിലും ആഴ്ചകളായി കുടിവെള്ളം ലഭിക്കുന്നില്ല. കഴിഞ്ഞ ദിവസം മുള്ളന്‍കൊല്ലിയിലെത്തിയ മന്ത്രി എ.കെ ശശീന്ദ്രന്‍ കുടിവെള്ള ക്ഷാമം രൂക്ഷമായ പ്രദേശങ്ങളില്‍ വെള്ളമെത്തിക്കാനുള്ള നടപടി സ്വീകരിക്കുമെന്ന് അറിയിച്ചെങ്കിലും റവന്യു വകുപ്പോ, ത്രിതല പഞ്ചായത്തോ ഇതിന് ആവശ്യമായ ഒരു നടപടിയും സ്വീകരിച്ചിട്ടില്ല.