വടകര: താലൂക്കിലെ വിവിധ ഭാഗങ്ങളില്‍ ഭൂമാഫിയ റവന്യൂ ഉദ്യോഗസ്ഥരെ ഭീഷണിപ്പെടുത്തുന്നതായി പരാതി. അനധികൃത ഭൂമി കൈയേറ്റം, ഖനനം, നീര്‍ത്തടങ്ങള്‍ മണ്ണിട്ട് നികത്തല്‍ തുടങ്ങിയ നിയവിരുദ്ധപ്രവര്‍ത്തനം നടത്തുന്ന മാഫിയകള്‍ വില്ലേജ് ഉദ്യോഗസ്ഥരെ  ഭീഷണിപ്പെടുത്തുന്നതായാണ് പരാതി.
 കഴിഞ്ഞ ദിവസം മരുതോങ്കര വില്ലേജ് ഓഫിസിലെ സ്‌പെഷല്‍ വില്ലേജ് ഓഫിസര്‍ എം.പി നന്ദകുമാറിന്റെ ഫോണ്‍ ചോര്‍ത്തിയ സംഭവമുണ്ടായി. താലൂക്കിലെ വിവിധ ഉദ്യോഗസ്ഥരുടെ ഫോണ്‍ ചോര്‍ത്തുന്നുവെന്ന പരാതി ഗൗരവമുള്ളതാണെന്നും കര്‍ശന നടപടികള്‍ സ്വീകരിക്കണമെന്നും കേരള എന്‍.ജി.ഒ അസോസിയേഷന്‍ വടകര ബ്രാഞ്ച് കമ്മിറ്റി ആവശ്യപ്പെട്ടു.
ബ്രാഞ്ച് പ്രസിഡന്റ് കെ.രാജേഷ്ബാബു അധ്യക്ഷനായി. വടകര തഹസില്‍ദാര്‍ക്കും ജില്ലാ പൊലിസ് സൂപ്രണ്ടിനും ഇതുസംബന്ധിച്ച് പരാതി നല്‍കിയതായി ഭാരവാഹികള്‍ അറിയിച്ചു.