കണ്ണൂര്‍: പതിമൂന്നാം പഞ്ചവത്സര പദ്ധതിയില്‍ ഉള്‍പ്പെടുത്തി ജില്ലയില്‍ നടപ്പാക്കാന്‍ ഉദ്ദേശിക്കുന്ന വിവിധ പദ്ധതികളെക്കുറിച്ച് ചര്‍ച്ച ചെയ്യുന്നതിനായി ജില്ലാപഞ്ചായത്തില്‍ വര്‍ക്കിങ് ഗ്രൂപ്പ് ചെയര്‍മാന്‍മാരുടെയും പദ്ധതി നിര്‍വഹണ ഉദ്യോഗസ്ഥരുടെയും യോഗം നടത്തി.
നവകേരള മിഷന്റെ ഭാഗമായി പ്രഖ്യാപിച്ച ആറു കര്‍മസമിതിയും നാലുമിഷനുകളും ഉള്‍പ്പെടുത്തിയ പദ്ധതികള്‍ക്കാണു പഞ്ചവത്സര പദ്ധതിയില്‍ പ്രാധാന്യം നല്‍കുക. പരിസ്ഥിതി സൗഹൃദത്തിന് ഊന്നല്‍ നല്‍കിയുള്ള കേന്ദ്ര-സംസ്ഥാന പദ്ധതികള്‍ കൂട്ടിയോജിപ്പിച്ചാണു പദ്ധതി. കാര്‍ഷിക മേഖലയില്‍ തരിശുരഹിത ജില്ലാപഞ്ചായത്ത് പദ്ധതിക്കും സേവന മേഖലയില്‍ പ്ലാസ്റ്റിക് റീസൈക്ലിങ് യൂനിറ്റുകള്‍ ആരംഭിക്കുന്നതിനും പ്രാധാന്യം നല്‍കും. കായികമേഖലയില്‍ എല്ലാവാര്‍ഡിലും കളിസ്ഥലമൊരുക്കുന്നതുള്‍പ്പെടെയുള്ള പദ്ധതികളും ആരോഗ്യമേഖലയില്‍ ആശുപത്രികളെ ഹൈടെക് ആക്കുന്ന പദ്ധതികളുമാണു പരിഗണിക്കുന്നത്. വിദ്യാഭ്യാസ മേഖലയില്‍ പൊതുവിദ്യാലയങ്ങളെ മികവിന്റെ കേന്ദ്രങ്ങളാക്കുന്നതിനാണു പ്രാമുഖ്യം. ഇതിന്റെ ഭാഗമായി രണ്ടുകോടി രൂപ അനുവദിച്ച് പദ്ധതികള്‍ക്കു തുടക്കമിട്ടിട്ടുണ്ട്. വനിതാ സൗഹൃദജില്ല, പകല്‍വീടുകള്‍, വായനശാലകളെ ആധുനികവത്കരിക്കല്‍, പ്രാദേശിക ചരിത്രരചന, സമ്പൂര്‍ണ ഇ-സാക്ഷരത ജില്ല, പട്ടികവര്‍ഗ മേഖലയില്‍ കുടുംബകേന്ദ്രീകൃത സങ്കേതം തുടങ്ങിയ പദ്ധതികളും പരിഗണനയിലുണ്ട്. പദ്ധതി നിര്‍വഹണത്തിനായി 15 വര്‍ക്കിങ് ഗ്രൂപ്പുകളാണു രൂപീകരിച്ചത്. സംസ്ഥാന ബജറ്റിനു ശേഷം നിര്‍വഹണം ആരംഭിക്കാനുള്ള തരത്തിലാണ് പദ്ധതി ആസൂത്രണം ചെയ്യുന്നത്. യോഗത്തില്‍ ജില്ലാ പഞ്ചായത്ത് പ്രസിഡന്റ് കെ.വി സുമേഷ് അധ്യക്ഷനായി. പ്ലാന്‍ കോ ഓര്‍ഡിനേറ്റര്‍ കെ.വി ഗോവിന്ദന്‍ പദ്ധതി വിശദീകരിച്ചു. കെ.പി ജയബാലന്‍, കെ. ശോഭ, വി.കെ രാജന്‍ സംബന്ധിച്ചു.