കൊച്ചി: വീടുകളുടെ 50 മീറ്റര്‍ പരിധിയില്‍ ക്വാറികള്‍ പ്രവര്‍ത്തിപ്പിക്കരുതെന്ന കേരള മൈനര്‍ മിനറല്‍ കണ്‍സെഷന്‍ ചട്ടത്തിലെ വ്യവസ്ഥ പൊതുതാല്‍പര്യം മുന്‍നിര്‍ത്തിയുള്ളതാണെന്നും ക്വാറി പ്രവര്‍ത്തനത്തില്‍ എതിര്‍പ്പില്ലെന്ന വീട്ടുടമയുടെ സത്യവാങ്മൂലം കണക്കിലെടുത്ത് വ്യവസ്ഥയില്‍ ഇളവ് അനുവദിക്കാനാവില്ലെന്നും ഹൈക്കോടതി വ്യക്തമാക്കി.
ക്വാറിക്ക് ജില്ലാ ജിയോളജിസ്റ്റ് സ്റ്റോപ്പ് മെമ്മോ നല്‍കിയതിനെതിരേ എറണാകുളം പച്ചാളം സ്വദേശിനി റോസ്‌ലിന്‍ഡ് ജോണ്‍ നല്‍കിയ ഹരജി തള്ളിയാണ് ഹൈക്കോടതി ഉത്തരവ്. ഇത്തരമൊരു വ്യവസ്ഥ ചട്ടത്തില്‍ ഉള്‍പ്പെടുത്തിയത് പൊതുജന താല്‍പര്യം കണക്കിലെടുത്താണെന്നും വീട്ടുടമയുടെ സത്യവാങ്മൂലത്തിന്റെ ബലത്തില്‍ ഈ വ്യവസ്ഥ മറികടക്കാന്‍ കഴിയില്ലെന്നും കോടതി പറഞ്ഞു.